Spurs lakah Chelsea an tlawm!
Inrinni zan London derby inkhelah Chelsea-in Tottenham Hotspur an ngam lo a, an mikhual lakah 2-0 in an tlawm - Blues goalkeeper Mike Penders chuan an lamah a tilut a, Mathys Tel chuan goal khat a khung bawk.
Stamford Bridge-a inkhelah Cole Palmer chu yellow card pahnih a hmuh avangin hnawhchhuah a ni a, Chelsea hian player 10-a an khelh hnuah goal hnuhnung zawk hi an chhuah.
Xabi Alonso-a'n league match hnih a zawna Blues a chakpui tawh chu a tawp ta a, Nilaini zan dar 1:30-ah League Cup fourth round khel turin Liverpool an lenchilh zui dawn a, Blues hmabak a awlsam lo hle.
A harsa
Chelsea-in hliam vangin striker Joao Pedro an chhawr thei lo a, Alonso-a'n Danny Welbeck luhtir mai aiin, false nine-a Morgan Rogers chhawr a, mual sira khel tura Geovany Quenda luhtir a thlang a, Spanish coach-in thutlukna a siamsual.
Rogers-a'n a position pangngai loah khelh a harsat a, amah thlawp tura dah Palmer nen an in 'link' hleithei lo a, midfield-ah Spurs an chungnun zawk bawk avangin Stamford Bridge-ah Chelsea an talbuai.
Mahse, first half-ah team pahnihin goal khung an harsat ve ve a, goal lut loin chawlhlawk an hmang. Chelsea tan Palmer-a'n chance duhawm nei mah se, goal-ah a chantir thei lo a, Spurs an him.
A goal ta
Chelsea-in hliam vangin Emi Martinez an chhawr thei lo a, a aiah Mike Penders chuan si ban a nghak. Minute 77-naah Belgian keeper hi a chesual zui a, corner aṭanga ball kal chu hnekchhuah a tumna lamah, an lamah a tilut ta daih!
Stamford Bridge-ah Chelsea an hnufual zawk a, thawh leh a harsa tawh dawn tih a lang chiang. Minute thum hnu lawkah Blues buaina belhchhah turin Palmer-a'n red card a hmu a, English forward hi hnawhchhuah a ni zui.
Spurs-in player tam zawk nih an chhawr zui a, minute 87-naah Tel chuan halfway line aṭanga ball tlanpuiin, yard 25 vela hla aṭangin goal-ah a shot a, Penders tan tih theih a awm lo - a goal a, 2-0 in Spurs an chak.
Hmabak harsa
Chelsea-in mahni mualah Spurs an ngam lo a, mualphona tawpkhawk a tling - Inrinni zana team pahnih intawn hma hian, EPL-a Stamford Bridge-a an inkhel hnuhnung 36-ah Spurs hi vawi khat chiah an chak!
Mahse, thawnthu a danglam ta a, Alonso team chu an buzawlah ngei Spurs-in an hneh a, an league match hmasa paruka chak nei lo Roberto de Zerbi team hian league match hnih a zawnin hnehna an chang ve ta.
Alonso-a'n EFL Cup-ah Liverpool a hmachhawn zui dawn a, kartawp league match-ah Manchester United an mikhual zui dawn bawk - Spanish coach tan fiahna hautak a inchhawp zel.