Real Kashmir-ah Mizo coach R-a

Indian Football League club Real Kashmir chuan Aizawl FC coach R. Lalruatfela chu assistant coach atan an lalut. Snow Leopards head coach hi Ishfaq Ahmed a ni a, R-a hian tun season-ah a pui dawn. IFL club hian Mizo player pathum Lalrokima, Lalawmpuia Sailo (OmOma) leh Joseph Lalvenhima te an kawl bawk.

Kolasib tlangval R-a hian AFC A Licence a nei a, MPL10-ah khan Project Veng FC-ah assistant coach hna rawn chelhin tualchhung football ngainatuten an hmelhriat ṭan. Chutihrualin Kolasib lamah erawh football zirna 442 Academy a nei a, football-ah mi thar a ni tawh lo.

Season khatnaah Kolasib club Project Veng inhamtang zo lo mah se R-a erawhin a theihna sang tak a lantir a, Aizawl FC-in assistant coach atan an lalut nghal. MPL11-ah Victor Lalbiakmawia puiin I League-ah pawh assistant coach hna a thawk bawk.

MPL12 aṭangin head coach hna a thawk ṭan a, record ṭha tak nen Aizawl FC hi League winner nomawi a chawipui. R-a hnuaiah Aizawl FC-in khelh dan nghet an nei a, tun season-ah I Day Football nomawi an chawi bakah MPL13-ah League winner nomawi an chawi nawn. Season liam ta khan IFL-ah Aizawl FC a enkawl tawh a, Mizo club-in IFL khelh theihna Nagaland United lakah an hralh tak avangin Kolasib tlangval hian Real Kashmir-ah chona thar a hmachhawn dawn.