Barca kaltluang lai titawptu Real Madrid
Tun season La Liga-a vawk lal len Barcelona chuan hneh loh an tawng ta a, an hneh loh hi tu dang ni loin an hmelma kumhlun Real Madrid a ni. Pathianni zan khan Barca hian hneh loh nei loa an kaltluang lai chu, an bu zawlah ngei Jose Mourintho hoten 2-1 a an tihtawpsak avangin a aia na a awm bik lo ang.
Real tan Kylian Mbappe-a'n goal hnih a khung a, Barca tan La Liga-a goal khung hnem ber ni mek Raphinha-a'n goal khat khung mah se inkhel tihmuhnawmtu mai a ni a, a team chhan nan a tawk lo.
Real an phur
Spotify Camp Nou-a inkhelah mual neitu team-in ball an chang hnem zawk a, mahse chance hlauhawm hmasatu erawh Real an ni thung. Arda Guler-a'n a hun ṭha neih pahnih chu a hmang ṭangkai thei lo a, Guler-a'n a pet ṭhat tawk loh bakah Barca keeper Joan Garcia-a'n a dang ṭha ve bawk.
Turkish midfielder a nung ṭha a, goal leh assist nei lo mah se an khingpuite tan a hnawk takzet. Mawi taka Barca box chhungah ball thlawh luh chu Mbappe-a'n goal zawnah a pet thei lo a, khung ngat se goal mawi bikah chhiar theih tur a ni.
Real-in chance an hlah nual hnuah an vanduai reng bik lo a, minute 41-naah vei lam sir aṭanga Yan Diomande-a cross chu Barca defender Gerard Martín-a'n na taka pet chhuah a tum a, mahse Mbappe keah pet perin chiang takin an lamah a lut ta zawkin Real-in hma an hruai.
Hansi Flick-a hoten chance an insiam hleithei lo a, Anthony Gordon-a shot chu Thibaut Courtois damloh vanga lut Andriy Lunin-a'n a dansak a, hei hi first half-a Barca chance ṭha neih chhun a ni.
Ennawm ropui
Second half-ah erawh Barca an insiamṭha hret a, dan pangngaiin ball an chang hnem zawk. An vanneih hun inher chhuak vein minute 61-naah corner aṭanga ball kal zel chu Pedri-a'n Raphinha tan a pe a, Brazilian forward a insiamrem hnuah goal-ah pet nghalin an siphurh a sut a, Real defender ten an hna an thawk ṭha tawk lo.
Goal an chhuah hnuah Real an ṭang lehzual a, Guler-a'n chance vawi hnih a hlah leh a, a vanneih zan ni se hattrick siam theihna chance a nei. Catalan club-in chance nei ve lehin Martin-a tauh chu Lunin-a'n ṭha zetin a save bawk a, Ukrainian keeper hian a hun ṭha neih a chhawr ṭangkai hle.
Team pahnihte inrum ṭhaih deuh reng mah se goal a lut lawk lo a, team pahnihte khel hmuhnawm viau mah se a pawimawh ber goal an khung thei lo. Point an insem dawna a lan laiin Real-in goal an khung hlauh.
Minute 87-naah Jude Bellingham-a'n mawi taka Barca player pathum venna kara ball a lak chhuah hnuah, Guler leh Eduardo Camavinga ten in pass lehin French midfielder Camavinga-a'n Pau Cubarsi a tlan hel hnuah Mbappe tan pein, Mbappe-a'n goal ruakah a hlah tawh lo a, Real chakna goal a khung.
Mbappe a ṭha
Inkhelh bana langsar ber chu Mbappe a ni a, kum 27 mi forward hian tun season inelna hrang hrangah goal 14 a khung tling leh der tawh a, La Liga-ah goal 11 khungin goal 13 khungtu Raphinha chiah a tluk lo.
Paris St-Germain forward hlui hian Real a zawm hnuah, inelna hrang hranga Barca a hmachhawn vawi sarih aṭangin goal riat a khung tawh. Pathianni zan inkhela a goal khung hi tun season-a a vawi khat nan, Barca tlawmtirtu a nih avangin a hlu lehzual a, Real fans lakah a tla na lehzual ang.
Eng nge an sawi?
Real Madrid manager Jose Mourinho chuan Barcelona hneh ringawt tum loa, La Liga champion tuma khel an nih thu a sawi.
Kum 63 mi Mourinho chuan, "Ka hmuh danah chuan Camp Nou-a Barca hneh tum ngawr ngawra khel kan ni lo a, La Liga champion tuma khel kan ni zawk. Kan inkhelh hma khan mi tam takin kan chak pawhin vanneih vang a nih tur thu an sawi a, mahse a khel ṭha zawk kan nih avangin kan chak.
Tun hnaiah kan thawkrim a, kan inbuatsaih ṭhat avangin hnehna kan chan hi kan phu. Kan khelh dan hi kan chhunzawm zel a ngai a, hnehna kan chan avanga thlamuang taka awm leh inthlahdah thei kan ni lo," a ti.
Portuguese manager hi Real enkawl tawh zingah El Clasico-ah a zawna vawi ruk tlawm lo pathumna a ni a, Miguel Munoz leh Vicente del Bosque te chiahin hetiang hi an ti thei a ni.
Hetihlai hian Barca coach Hansi Flick-a chuan, "Kan zin kual nasat avangin kan player te an chau a, chu chu kan khelh danah a lang. Club lian kan tumin a harsa lehzual a, inkhel kan thunun thei lo a, kan vanneih ni a ni lo. Mahse kan tihsual aṭangin kan insiamṭha ang a, kan tlu hlen lo ang," a ti.