Liverpool an chak; an invawrh sang zel

Andoni Iraola hnuaia indinthar hna thawk mek Liverpool-in kawng dik an zawh zel a, Pathianni zan Premier League inkhelah Brighton & Hove Albion chu 2-0 in an hneh - Pascal Gross chuan an lamah a tilut a, Alexander Isak chuan goal khat a khung bawk.

Manchester City laka an tlawm hnuah Liverpool hian inelna hrang hrangah match li khelin an la chak vek a, table-ah palinaah an invawrh chho ta - Reds hian hmahruaitu Manchester City chu point ruk chauhin an phak lo tawh a, season ṭantir mai la ni mah se, Merseyside club ṭantuten champion an sawi ri ve leh ta.

Liverpool tan Premier League-ah tun season-a Anfield-a an chak hmasak ber a ni nghal a, Iraola-a'n inrintawkna a neih belh ang - November 1, Pathianni zanah Liverpool hian Arsenal an mikhual zui dawn a, Premier League a la 'hot' dawn chauh!

Reds hian league match an khelh leh hmain chinfel tur hmasa erawh an nei a, Nilaini zan dar 1:30 hian League Cup fourth round-ah Chelsea an mikhual dawn. Xabi Alonso naute hi an hneh thei a nih chuan Arsenal hmachhawn turin an inringtawk sawt ang.

This is Anfield!

Brighton-in beisei phak bakin season an hmang ṭha a, Premier League team hmuhnawm ber pawla chhal ngam an ni - Reds an hmachhawn hma an league match hnuhnung paliah an chak vek a, heng zingah hian 3-0 ngawta Arsenal an sawp pawh a tel.

Premier League-ah goal 23 tehmeuh mai an khung der tawh a, nuam ti takin goal an khung pup pup a ni ber mai! Hetihlai hian Liverpool erawh beisei anga season bul ṭan lo an ni a, an tlarhnung a pawp bawk avangin Brighton lakah fans an hlauthawng.

Reds hlauhthawnna belhchhah turin Brighton hian chance hlauhawm an nei hmasa zawk a, team movement mawi zet an pholan hnuah Yasin Ayari chuan uiawm lutukin a thlawh over - Liverpool an vannei tih loh rual a ni lo.

Mahse, hei hi Anfield a ni a, Liverpool an nghing duh lo. An chance neih chhawr lotu Brighton an hrem zui vat a, minute 17-na lekah Brighton tlarhnung buai nuai karah Florian Wirtz-a'n goal-ah a shot a, Pascal Gross chuan an lamah a tilut!

Alex the great?

Season hmasa lawka British transfer record fee siamtu, Liverpool-in an lakluh fuh lohzia hahipa an sawi Alexander Isak-a'n tun season chu a goal khung thiamna ballboot a bun deuh reng a, harsatna a tawk lo.

Brighton lakah pawh Swede striker hi kan hmu leh ta a, minute 21-naah Bradley Barcola siamsak chu hnai set sawt aṭangin goal-ah a chantir. Anfield-ah Liverpool thawm a ṭha a, chawlhlawk pawh an hman hma emin chak tur a chiang tawh.

Liverpool vanneih zan ni se, goal tam zawk khung thei an ni. Cody Gakpo pawhin goal khungna chance vawi hnih ngawt nei mah se, Brighton goalkeeper Bart Verbruggen chuan ṭha zetin a dansak ve ve a, Ronald Araujo khung tur nia lang a dansak bawk.

Isak pawhin khung belhna remchang a neih a chhawr lo a, Seagulls midfielder hlui Alexis Mac Allister-a'n a club hlui lakah goal khung theihna remchang a neih a chhawr bik lo - Brighton tan Alisson tihsual zarah Ayari-a'n chance nei leh mah se, post a tihper a, Reds an vannei.

Hmalam pan zelin...

Season hmasa nipui transfer-a Liverpool sum hman hnemzia kan hria a, an player lakluhten beisei an phak lohzia lah kan hai lo. Mahse, season a thar a, league match riat an khelh meuh chuan Reds player man toten an man an phuzia an pholang ṭan.

Season hmasaa league match 14 a khelh aṭanga goal thum khungtu Isak-a'n pound maktaduai 125 man a nih chhan a pholang ṭan a, tun season inelna hrang hrangah match 10 khelin goal ruk a khung tling ta a, assist vawi khat a nei bawk.

£116mtd man Florian Wirtz a hmuhnawm tawlh tawlh a, a thiamzia kan tem ṭan ta. Tun season-ah match 11 aṭangin goal khat leh assist vawi thum a nei a, statistic aṭang ai mahin khelmuala a che tla thlira a ṭhatna teh chi a ni.

Bradley Barcola pawhin season ṭantirah sawisel hlawh mah se, £100mtd chuang man a nih chhan a pholang ṭan a, match 10 aṭangin goal thum leh assist vawi thum a nei ta - tlarhnungah Ronald Araujo sawi hmaih a thiang lo a, Barca fan-ten an ui ṭan tawh mai thei!