Real daltu Cazorla

Real Madrid chu FIFA Club World Cup an champion hnua La Liga match hmasa berah Villarreal nen 2-2 in an inhnehtawk a, Yellow Submarine tan Santi Cazorla chuan goal hnih a khung.

El Madrigal-ah Los Blancos hi Club World Cup champion an nih avangin Villarreal-in 'guard of honour' an pe a, khelmualah erawh zahngaihna lantir an tum lo thung.

Inkhel ṭan aṭanga minute lina lekah Cazorla-a'n mawi zetin vei lam aṭangin Thibaut Courtois a dah theih loin a hlai lut a, amaherawhchu Real-in minute thum hnuah Karim Benzema tauh luh hmangin siphurh an sut a. Minute 20-naah Raphael Varane hmangin Los Blancos-in hma an hruai leh bawk.

Relegation zone chhuah-san turin Villarreal-in point hmuh an mamawh a, Cazorla bawk rawn langin minute 82-naah a lu hmangin goal pawimawh a khung. Santiago Solari hoten point hnih hlu tak an hloh a, Real hi palinaah awmin hmahruaitu Barcelona chu point sarih an pha lo.

Kum 34 mi Cazorla hi a ke (Achilles tendon) ah hliam a tawrh avangin ṭum 11 zet zai a tawk a, kum ruk zet Arsenal tan a khelh hnuah a larchhuahna Villarreal-ah tun nipui khan a kir a, tun hi goal a khung lehna hmasa ber a ni. Talent nei ṭha bik Cazorla hi a hliam avangin ke a kal thei lo dinhmunah a ding hman a, tunah erawh khelmual lut leh tawhin Real lamah goal a khung thei a, a harsatna paltlang avang hian a chanchin ngaihventu leh lawmpuitu an tam hle.