Antonelli-a'n champion a hnaih zel

Andrea Kimi Antonelli chuan Pathianni zan khan United States Grand Prix-ah hnehna a chang a, point 25 hmuh belhin la champion chiah lo mah se point hnih bak a mamawh tawh lo a, Mercedes driver hian champion turin a nghah hret a la ngai.

Circuit of the Americas-a intlansiakah Antonelli hian bul a ṭan ṭha a, hmahruai nghalin Ferrari driver pahnih Lewis Hamilton leh Charles Leclerc te bakah, Red Bull driver Max Verstappen ten hnaih ve hman viau mah se an el pha meuh lo.

Lap 32-naah Leclerc-a'n Antonelli hi lehpelin hmahruai ve zeuh mah se lap khat pawh a daih lo a, lap tawp ber thlenga inthlahdah tawh loin phu takin Antonelli a chak.

Leclerc chu pahnihnaah thlengin Antonelli nen second 13-in an inthlau a, Verstappen chu pathumnaah a thleng bawk. Hamilton chu palinaah thlengin podium a lawn pha lo a, Verstappen nen an inthlauhna hi second khat pawh a tling lo.

Champion lai Lando Norris chu parukna niin Red Bull driver pakhat zawk Isack Hadjar leh a teammate Oscar Piastri te a hnungah an thleng a, Antonelli teammate George Russell erawh pariatnaah a ni thei hram.

Kum 20 mi Antonelli chuan, "Kan result beisei ang tak kan hmu a, he team hian hetiang dinhmun thleng tur hian kan thawkrim a, ka phu takzet. Engkim hi kan inlungrualna a ṭhat vang a ni," a ti.

November 2, Pathianni zan hian Mexican GP a awm leh nghal dawn a, Autódromo Hermanos Rodríguez-a intlansiak turah hian Antonelli tan champion theihna chance a sang tawh hle.

Italian driver hian hnehna a chang lo a nih pawhin Russell leh Hamilton te result-ah a innghat dawn a, driver pahnihte zinga tu emaw zawk zawk pawh lo chak se 10-naah a thleng thei a nih chuan a champion dawn tho.