Fiorentina lakah Inter an vannei

Serie A champion lai Inter Milan chuan Pathianni zan khan 2-1 in Fiorentina an hneh a, mahse Cristian Chivu naute hian hnehna chang turin vanneihna an mamawh a, chak loh nei loa kal zelin hmahruaitu an nih chhunzawm bawk.

Fiorentina tan Alex Jimenez-a'n goal hmahruai khung mah se, injury time-a Marcus Thuram leh Piotr Zielinski ten goal hmangin Inter-in an mikhual an lehthal.

San Siro-a inkhelah mual neitu an nung ṭha a, mahse David de Gea an paltlang thei lo. Manchester United keeper hlui hian Thuram, Pio Esposito leh Petar Sucic te shot a dansak vek a, first half-ah goal a lut lo.

Second half-ah Fiorentina-in goal an khung a, minute 65-naah Jimenez-a'n Inter keeper Ivan Provedel-a position dik lo hmu fuhin box pawn aṭangin mawi takin a khung. Inter-in a sutna an neih lawk loh avangin an tlawm dawnin a lang hman.

Mahse Inter an beidawn duh loh rah an hmu a, hunpek pelh minute khatnaah Thuram-a'n tawih zeta pet goal-in an siphurh a sut. Hun tawp hma hretin French forward hi Fiorentina defender Víctor Valdepeñas-a'n a tihtluk vangin penalty a chawi a, Zielinski-a'n pet lutin Inter an chak zui.

Inter hian inkhelh chhung zawngin vawi 30 zet shot an nei a, mahse hnehna chang turin vanneihna an mamawh. Hliam vanga chawl mek Lautaro Martinez tel loin goal hmaah an hriam tawk lo hle.