Bayern-in hmahruai leh nghal

Bundesliga champion lai Bayern Munich chuan Pathianni zan khan an mikhualna ramah Freiburg chu 3-1 in a hneh a, an hmelma Borussia Dortmund paihthlain hmahruaitu an ni leh nghal.

Bayern tan Dayot Upamecano, Serge Gnabry leh Michael Olise ten goal khat ṭheuh an khung a, Bavarians midfielder Tom Bischof-a'n lamah tilut mah se awmzia a nei thui tawh lo.

Minute 15-na lekah counter attack hmang ṭangkaiin Upamecano-a'n keeper chauh a hmachhawn hnuah an hmahruaina goal a khung a, Gnabry-a'n first half tawp hma hretin an hmahruaina a belhchhah bawk.

Second half-ah goal a lut lawk lo a, minute 82-naah Bayern midfielder Bischof-a'n an lamah a tilut palh a, Freiburg an phur thar. Chance duhawm vawi hnih neih chhunzawm mah se, Manuel Neuer aia lut Jonas Urbig-a'n ṭha zetin a dang a, chhuah ngat se result a danglam phah ang.

Freiburg-in an siphurh sut tumin an nawr zel a, point khat hlawh chhuah tumin beiseina sang tak nei mah se keeper Mio Backhaus a chesual a, a ball chan lai Olise-a'n chhuhsakin yard 35 bawr zel aṭangin an chak nemnghehna goal a khung.