Zaninah East Bengal inlan dawn

Indian Super League champion East Bengal chuan zanin dar 9:30 hian AFC Champions League Two match an khel dawn a, khualmualah Al-Seeb an lenchilh dawn - inkhel hi FanCode app leh website-ah te en theiha pekchhuah a ni ang.

AFC Champions League Two hi Europa League tlukpui niin, Asia khawmualpuia club inelna sang ber dawttu a ni. East Bengal hian ISL champion nih avangin inelna hi an hmachhawn a, preliminary stage aṭanga khel ṭanin, group stage an inhlangkai.

Kolkata club hian match hnih khel tawhin, an match hmasa berah Jordan club ṭha Al-Hussein chu 2-2 in an inhnehtawkpui a, match hnihnaah Al-Shorta chu 3-2 in an ngam lo - Iraqi club lakah hian David Lalhlansanga chuan goal hnih a khung a, a vanneih zan ni se, hattrick a siam hial ang.

East Bengal-in zaninah Oman club Al Seeb an hmachhawn dawn a, an lenchilh tur club hi match hnih khelh tawha la tlawm ve ve an nih avangin Indian club tan point hlawhchhuah theihna tur remchang a ni - an chak zo lo a nih chuan round of 16 luh beisei loh law law a finthlak mai thei.

Al-Seeb hi Oman champion niin, striker Axel Méyé hi Gabon international, ram tana match 37 khel thei a nih avangin ven bik a sual dawn lo - Nigerian midfielder Augustine Oladapo pawh ram tana vawi nga inlan thei a ni a, winger Prince Aggreh pawh Nigeria tana vawi li inlan tawh a ni.

Hetihrual hian East Bengal hian season duhawm tak an hmang mek. Season bul ṭan nan Durand Cup-ah an champion a, ISL-ah lah match hnih an khelh tawhah goal kua khungin, an lamah goal khat chiah a lut - khualmualah hnehna chan an beisei dawn.

Kolkata club hian defender Lalchungnunga, forward Edmund Lalrindika leh striker David Lalhlansanga te an nei a, hmun pawimawh an chang vek - Vairengte tlangval David-a hian preliminary stage nen goal thum a khung tawh a, assist vawi khat a nei tel bawk.