Saka thlaktu tur Dowman?

Arsenal manager Mikel Arteta chuan hliam vanga chawl mek, Bukayo Saka hmun ruak hnawh khat turin Max Dowman a hmang dawn a, zanin dar 1:30-a Fleetwood Town nen League Cup an khelh hunah bul a ṭan dawn niin khawthlang chanchinbuten an tarlang.

October 21, Nilaini zana Gunners-in Bayern Munich an hmachhawn ṭumin Saka chu a malpui a tihnat avangin minute 10-na lekah lak chhuah a ngai a, a hliam hi en dik a nih hnuah kar ruk aṭanga kar riat bawr vel a chawlh a ngai dawn.

English forward awm lo tur hi Gunners tan channa nasa tak tling mah se, a thlak turin kum 16 mi Dowman-a hming a ri ring a, Premier League-a goal khung thei naupang ber hian Fleetwood lakah bul a ṭan a nih pawhin a mak lo ang.

Eberechi Eze lam hmaih a thiang lo a, kum 28 mi forward hi Bavarians laka Saka thlaktu niin goal a khung nghe nghe. Chutihrualin Eze hi Inrinni zana Everton an hmachhawn ṭumin a khel ṭha tawk lo hle.

Toffees lakah Eze hi minute 79-naah lak chhuah a ni a, a thlaktu chu Dowman a ni. Arsenal squad a chhah avangin Arteta-a'n duhthlan tur a ngah a, hmun pawimawh a chan loh avangin Eze hian Emirates Stadium chhuahsan a duh nia sawi a awm bawk.

Spanish manager tan Saka awm loh chhungin tu nge a hman dawn tih zawhna a tam a, rinrawla hman turin Eze a khelh ṭhat tawk loh bakah tawnhriat a ngah tawk loh vangin Dowman rin bur a har bawk ang. Hetihlai hian tun nipuia an lak luh Christos Tzolis-a'n dam lam a pan leh tawh a, zaninah a inlan thei lo a nih pawhin Gunners tan buaina tur a awm lo ang.