Australian Open champion lai chak lo

Caroline Wozniacki chuan Australian Open nomawi a kawl lai humhim a tum a, inelna lian a hmachhawn hmain inbuatsaih nan ASB Classic-ah a inlan. Mahse, beisei ang result a nei lo; a match hnihna lekah a chak lo nghal.

Ningani zan Auckland-a inkhelah world number 3 Wozniacki hi kum 18 mi chauh Bianca Andreescu lakah 6-4, 6-4 in a chak lo nghal a, world number 152 hi a service a chhuhsak theih loh laiin a service ṭum hnih a hloh thung a ni.

Seeded pakhatna a nihna hmunah Wozniacki-i'n beisei a phak lo a, hei vang hian January 14 aṭanga khelh tur Australian Open hmain a rang thei ang bera insiamṭhat a pawimawh ang - Grand Slam vawi 43 a khelhnaah season hmasa khan a champion ve chiah a ni.

Wozniacki hnehtu Andreescu hian a match lehpekah chuan vawi sarih champion tawh Serena Williams a hmachhawn dawn a, "He hmunah hian player ṭha an tel ṭhin tih chu ka hria, mahse hetiang stage-ah chuan a zawna a lian pahnih hmachhawn hi ka inbeisei lo," tiin a sawi.

Seeded parukna Serena hian quarterfinal lut tur hian Lauren Davis chu 6-4, 6-3 in a lo hneh ve thung. American nula hian kar hmasa khan Wozniacki inkhel lai a en a, mahse a beisei loh zawk a hmachhawn a ngai dawn.

Tennis season an ṭan chho a, Grand Slam hmasa ber Australian Open inbuatsaihna tournament a tam hle. Brisbane lamah US Open champion lai Naomi Osaka chuan Anastasija Sevastova 3-6, 6-0, 6-4 in a hneh. Kum 21 mi Osaka hian Lesia Tsurenko a hmachhawn leh ang.