Globe Soccer Awards dawngtu Ronaldo

Globe Soccer Awards chu Ningani zan khan Dubai-ah sem a ni a, Portuguese superstar Cristiano Ronaldo chu Player of the Year-ah thlan a ni.

Ronaldo hian season ṭantirh khan Real Madrid aṭangin Juventus a zawm a, kum 33 mi hi France World Cup champion puitu Kylian Mbappe leh Antoine Griezmann te aia thlan a ni a, tun ṭum hi a vawi nga dawnna a ni.

Portugal captain hian Globe Soccer Awards hi kum 2011, 2014, 2016 leh 2017 te khan a dawng tawh bawk a, lawmman semnaah hian a nupui hual Georgina Rodriguez leh a fapa Cristiano Junior te a hruai. 

Ronaldo chuan, "Kum bul ṭan dan ṭha tak a ni a, kan hnathawh min hriatpuitu ka nei hi ka lawm hle a ni," tiin a sawi.

Globe Soccer Awards hi kum 2010 aṭanga sem ṭan a ni a, European Association of Player's Agents, EFAA leh European Club Association, ECA te sem a ni a. Bul ṭan kum hian player tan chawimawina siam loin best agent, best director leh special career award chawimawina chiah a awm.

Tun ṭumah hian World Cup-a France champion puitu Didier Deschamps chu best coach-ah thlan a ni a, Brazilian legend Ronaldo hnenah player career award hlan a ni a, best club of the year atan Atletico Madrid thlan an ni.