Intum tawk tur Liverpool leh Chelsea intawng dawn

Zanin dar 1:30 hian League Cup fourth round-ah Liverpool leh Chelsea an inhmachhawn dawn a, tun season-a an khelh tawh dan thlirin intum tawk tak tur an nih avangin inkhelh hmuhnawm a beisei ngam.

Premier League-ah pawh club pahnihte hi an inhnaih a, Liverpool hi palina an nih laiin Chelsea hi pangana an ni ve thung a, point hnih chiahin an inthlau. Fourth round chauh la ni mah se en bik an hlawh dawn.

Hello Reds

Premier Leeague champion puitu Arne Slot ban a nih hnuah Liverpool-in Bournemouth vawrh sangtu Andoni Iraola an la lut a, beiseina sang tak nei mah se Iraola a che ṭha nghal bik lo.

Spanish manager hian Premier League-a Reds a kaihhruaina match hmasa pali aṭangin point ruk chauh a hmuhpui a, Champions League-a an match hmasa berah Atletico Madrid chu Anfield-ah an ngam lo bawk.

Kum 44 mi Iraola rinhlelhna a awm ṭan a, mahse sum hmang hnem Tottenham Hotspur an hneh hnuah a club hlui Cherries chu a hnehpui leh a, Premier League-ah vawi khat chauh la tlawmin an hneh lo awmchhun hi Manchester City a ni.

Chutihrualin Spurs an hneh lai hi London club insiamrem hma a ni a, City lakah an chak lohin Ryan Gravenberch-a'n red card a hmu bawk. Iraola-a'n chhuanlam tur a neih ṭhat avangin a tan Chelsea hi fiahna a ni ang.

Tute nge khel dawn?

Goalkeeper Alisson Becker leh Virgil van Dijk te chu Iraola-a'n chawlh a pe dawn nia sawi a awm a, Bradley Barcola leh Florian Wirtz te pawh hliam tenau an neih avamgin an inlan lo mai thei niin khawthlang chanchinbute chuan an tarlang.

Reds hian Pathianni zanah champion lai Arsenal an hmachhawn leh nghal dawn a, November 4, Nilaini zan UCL-ah Fenerbahce an lenchilh dawn a, player pawimawh an inlan lo a nih pawhin a mak lo ang.

Player ṭhenkhat inlan dawn lo mah se Alexander Isak a awm a, Swedish striker hian Premier league-ah goal ruk a khung tawh avangin en a hlawh leh dawn. Isak hi Cody Gakpo leh Rio Ngumoha te an thlawp ṭhat a ngai dawn a, Alexis Mac Allister leh Dominik Szoboszlai te mawhphurhna a sang dawn bawk.

Blues ve thung

Xabi Alonso enkawl Chelsea erawh bul an ṭan ṭha thawkhat a, chutihrualin an match hnuhnung pangaah vawi hnih chauh an chak a, Inrinni zan khan Reds hneh hnu Spurs hneh loin goal an khung ve lo.

Blues hi season hmasa an chet chhiat avangin tun season-ah Europe inelnaah an tel pha lo a, mahse hei hi Liverpool lakah an vanneihpui thei thung.

Pathianni zanah Manchester United an mikhual dawn a, United talbuai lai a nih bakah UCL khelh tur an neih ve loh avangin Spanish manager-in player pawimawh hahdamtir a mamawh ve kher lo.

Hliam vangin Blues hian Reece James leh Emiliano Martinez te chu inlan lo tur chiang sa an ni a, Spurs laka hnawhchhuah Cole Palmer chu hrem a nih avangin a khel dawn lo bawk.

An dam bik lo

Anni bakah hian Joao Pedro, Pep Chavarria, Emmanuel Emegha leh Jamie Gittens te dinhmun a chiang lo a, London club hi an dam kim bik lo. Chutihrualin Morgan Rogers a dam ṭha a, veteran player Danny Welbeck leh Jordan Henderson te an inlan a rinawm bawk.

Alonso lawmna tizual turin Estevao Willian a lo kir leh tawh a, Brazilian forward hi a hliam dam hnua a vawi khatna atan bul a ṭan a beiseiawm. Kum 19 mi Willian hi bench-ah a ṭhut pawhin Geovany Quenda leh Pedro Neto te an la awm cheu a, an squad a chhah ṭha tawk.