Honduras lakah India an tlawm

India Under-15 chak loh a kaltluang laklawh - FIFA U15 World Cup Tier C-a an match hmasa berah India hian 2-1 in Honduras an ngam lo a, tier C Round of 32 aṭanga tlain, tier hniam zawka Round of 16-ah an tla thla tihna a ni.

Honduras hian Danio Flores hmangin minute 18-naah goal hmahruai an khung a, mahse, India tan Ronandev Aheibam chuan si phurh sutna goal a khung a, 1-1 a ni.

India hlim chhung erawh rei lo tak a ni. Minute 36-naah Honduras lam hian goal an khung leh a, Alejandro Amaya chuan Honduras hi hma a hruai nawn pui - India hian a chhanletna tur an nei tawh lo a, an tlawm ta a ni.

Mizo naupang R. Lalremruatfela'n India tan inkhel bul ṭanin, goal khung theihna remchang nei mah se, a freekick pet ṭha tak chu Honduras keeper Borjas chuan ṭha takin a dansak a, India an vanduai.

India hian France laka 4-2 a tlawm Trinidad and Tobago chu nizan khan an hmachhawn lehnghal a, an result kan hre hman lo.

Azerbaijan-a khelh FIFA U15 World Cup hi qualification awm loa khelh niin, inelna neih a nih vawi khatna a ni a, team tel ringawt pawh 189 an tling!

Hei vang hian tournament-ah hian a hnuai lama tlate pawhin match an khelh theih zelna turin ruahmanna siam a ni a, nizana India inlanna tur hi 81-na aṭanga 96-na dinhmun luahtu tur zawnna a ni a, an chak loh chuan an tlahniam leh ang.

Tarlan tawh ṭhin angin India squad-ah hian Mizo pathum an awm a, R. Lalremruatfela bakah C Lalhmingropuia leh Victor Lalawmpuia te an tel a ni.