East Bengal-in goal khung lo

AFC Champions League Two-ah chak mamawh East Bengal an chak zo lo a, khualmualah Al-Seeb chu 0-0 in an inhnehtawkpui - Kolkata club hian match thum aṭangin point hnih chiah an la nei a, knockout round luhna chance a chhe ta tial tial.

Oman club khelmualah East Bengal tan Lalchungnunga, Edmund Lalrindika leh David Lalhlansanga ten inkhel bul an ṭan vek a, mahse, Mizo tlangvalten East Bengal an chakpui thei bik lo.

East Bengal tana chance ṭha bera chhal ngam chu David-a ke bulah a tla a, mahse, Edmund-a'n duhsak taka a siamsak chance duhawm chu Vairengte striker hian goal-ah a chantir thei lo a, kut ruakin an lo haw.

Antonio Habas enkawl East Bengal hian Indian Super League match an khelh leh hmain, Al Seeb hi Salt Lake Stadium-ah an mikhual ve leh dawn a, November 3, Thawhlehni zanah an intum ang.

Asia khawmualpuia club inelna sang ber dawttu AFC Champions League Two-ah hian East Bengal hian match thum an khel ta a, match hmasa berah Jordan club Al-Hussein chu 2-2 a inhnehtawkpuiin, Iraqi club Al Shorta chu 2-3 in an ngam lo zui.

Match thumnaah chak la nei lo Al Seeb hmachhawnin, Omani champion lakah goal an khung thei lo - Kolkata khawpuiah an chak zo lo leh a nih ngat chuan last 16 luh beiseina an mangṭha a ngai tawh hial ang.

East Bengal hi group D-ah awmin, point hnih an hmu mek a, pathumna an ni - pakhatna leh pahnihna ten last 16 an lut dawn a, Kolkata club tan hmabak match-ah tlawm a thiang tawh lo.