Kuyt-a'n Fenerbahce enkawl dawn

Liverpool striker hlui Dirk Kuyt chuan Turkish club ropui Fenerbahce a enkawl dawn a, mahse, Dutch manager hi coach lailawk atan rawih a ni phawt ang.

Kum 46 mi Kuyt hi Turkish club-ah hian assistant coach a ni sa a, Ismail Kartal a thawhpui ṭhin. Mahse, Thawhṭanni zan khan Fenerbahce hian 2-1 in Galatasaray an hneh lo a, Kartal hi a hna aṭangin a bang zui.

Player a nih laia Fenerbahce tana league nomawi lo chawi tawh Kuyt hian coach thar nghet an neih hma chhung atan chauh Turkish club hi a enkawl dawn a, a club hlui Liverpool a hmachhawn dawn!

Kuyt hian a match hmasa berah league-ah Fenerbahce kaihruaiin, October 31, Inrinni zanah Goztepe an mikhual ang a, November 4, Nilaini zanah Liverpool chu Champions League-ah an mikhual zui dawn bawk a ni.

Dutch striker hlui Kuyt hian Liverpool tana a khelh laiin inelna hrang hrangah match 285 a khel a, goal 71 a khungsak. Reds tan League Cup-ah chiah champion-in, Champions League leh FA Cup-ah te final a luhpui bawk.

Liverpool a chhuahsan hnuah Fenerbahçe leh Feyenoord tan khelin, league-ah a champion pui ve ve a, inkhelh a chawlhsan hnuah Feyenoord Under-19, Dutch club ADO Den Haag, Belgian second division club Beerschot leh Dutch second division club FC Dordrecht a lo enkawl tawh.

Beerschot hi Belgian second division-ah champion puiin, top flight league a inhlankaipui a, June 2026 khan Turkish club hi Assistant Coach ni turin a zawm - tunah chuan coach lailawk mawhphurhna a chelh dawn ta.

Kuyt-a thlak tak Kartal hi September khan a lo bang tawh a, mahse, club-in a pawm lo. Tunah erawh a banna an pawm ta a, Turkish Super Lig-ah pangana ni mekin, hmahruaitu Galatasaray chu point rukin an phak lo mek.

Netherlands tana vawi 104 inlana goal 24 khungtu Kuyt-a'n an result duhawm lo thlak danglam a tum dawn a, a kaihhruaina hnuaia Liverpool an hmachhawn tur mawlh hi en a châkawm ta hle.