Celtics chakna Jayson Tatum

NBA regular season khelh mekah nimin zing khan Boston Celtics leh Brooklyn Nets te an inhmachhawn a, Jayson Tatum chuan point 40 neiin an chakna point a score a, 125-124 in a team a chakpui.

TD Garden, Boston-a inkhelah team pahnihten bul an ṭan chhe lo ve ve a, mahse first quarter tawp lamah Celtics-in point score an harsat laiin Nets player te kut a kal zel a, 31-26 in hma an hruai.

Second quarter-ah pawh hma an inhruai chhawk zak zak a, Celtics tan Tatum bakah Mitchell Robinson, Derrick White leh Jordan Walsh te an che ṭha , point 30 zet score mah se Nets-in Moritz Wagner leh Julius Randle te hoin point 30 an score ve tho a, 61-56 in chawlhlawk an hmang.

Third quarter-ah erawh Nets an inthlahdah a, Celtics tan Baylor Scheierman a inlar bakah Tatum a khel ṭha chhunzawm zel a, Nets tan Randle a khelh ṭha hlauh a, 86-72 chauhin an hnufual theih phah.

Fourth quarter-ah Celtics an khel chhe lo a, mahse Nets-in theihtawp chhuahin an khel a, 117-114 a an hnufual laiin Mikel Brown Jr-a'n second hnih chiah awm tawhah three point a vawm lut a, overtime khel turin a team a hruai thleng.

Overtime-ah Nets-in bul an ṭan ṭha zawk a, Randle dan hleihtheih loh khawpin a tal na a, Brown Jr leh Michael Porter Jr ten an thlawp ṭhat bawk avangin point ngain hma an hruai leh nghal.

Mahse Celtics-in Tatum an nei a, American forward hian an inthlauhna zau lutuk tur a pawt zim thei zel. Celtics basket a tan laiin Nets an fimkhur tawk lo a, ṭul lo taka foul an ngah avangin Celtics-in free throw hmangin 124-123 in an hnaih theih phah.

Second ruk chiah a awm tawh tihah Brown Jr-a'n 'lay up' a lut thei lo a, Celtics-in 'timeout' an la nghal a, hun tawp nan second thum pawh a awm tling tawh lo.

Inkhel ṭan a nih leh hnuah White-a'n Tatum a pe a, Brown Jr. leh Keon Ellis venna karah buzzer rik rual chiahin 'mid range' aṭangin a lut a, a team chu hnehna duhawm a chanpui.

Kum 28 mi Tatum hi a ṭhainten an thlawp ṭha a, point 10 score tling pali zet an awm. Nets tan player paruk zetin point 10 score tling mah se an vanduai ṭum an tawng a, an chak loh dan an thlir letin an ui lehzual ang.