Alvarez vangin Barca-in pawisa chawi

Spanish champion Barcelona chu kumin nipui laia Julian Alvarez lak luh an tum dan chungchangah thiam loh an chang a, Royal Spanish Football Federation (RFEF) chuan Catalan club hi euro 602 chawi turin a ti.

Nipui transfer lai khan Barca chuan Argentine forward hi lak luh tumin an bei a, mahse a khelhna Atletico hrilh hmasa loa mimal an lo dawr avangin an lungawi lo a, RFEF bulah an hek. Madrid club hian FIFA lakah pawh zualko mah se hrem turin thuneihna an nei lo thung.

Heng hunlai hian Alvarez chuan Barca tana khelh chu a duhthusam a nih thu a sawi a, hei vang hian fans an thinrim takzet. Chanchin a ngah avangin Diego Simeone-a'n an match hmasa lamah a chhawr duh lo bawk. Khelmual chhunga a inlan leh pawhin an au el nasa hle.

Kum 26 mi Alvarez hi Atletico-ah a châm chhunzawm a, kum 2030 thleng contract a nei bawk. Interview a hmachhawnah ngaihdam dil bawkin tun hnaiah chuan a chhuah a rinawm tawh loh.

Alvarez chuan, "Ka thil sawi leh ka sawi hun kha a fuh lo takzet a, fans an thinrim pawh kha ka hrethiam. Keipawh fans zingah khan tel ila ka lungawi bik lo ang, helai hmun ka lo thlen tirha min lawm luh dan ngaihtuahin a thinrimthlak dawn," a ti.

Ngaihdam a dil hnuah Alvarez hi Simeone pawhin a ngaidam a, a thiam lohah a inpawm avangin a fak zawk. Fans pawhin Alvarez an lawm leh tawh a, Atletico tlarhma innghahna ber a ni leh tawh.

Manchester City forward hlui hian tun season inelna hrang hrangah match kua khelin goal hnih leh assist pahnih a nei tawh a, Atletico chu La Liga-ah pahnihnaah awmpuiin an hmelma Real Madrid chungah an awm a, Barca chiah an tluk lo.