Switzerland tan Xhaka khel leh dawn

Switzerland captain Granit Xhaka chu hrem a nih hnuah an ram tan khelh an phalsak leh a, November thlaa Slovenia leh Scotland nen Nations League-a an inhmachhawn hunah a inlan leh thei tawh dawn.

Sunderland midfielder hi kum 2021-a Arsenal tan a khelh laiin Covid-19 vaccine certificate lem a hmang tih hmuh chhuah a ni a, Swiss prosecutor ten chhui chianna an neih hnuah amah ngeiin a nemnghet.

Kum 34 mi Xhaka chuan khatih lai khan Covid vaccine chu a rintawk loh thu a sawi a, a him ngei em tih a chianna a awm loh avanga la ngam lo a nih thu a sawi tawh.

Swiss Football Association (SFV) chuan Thawhlehni khan Xhaka a khel leh thei tawh dawn tih thuchhuah an siam a, Arsenal midfielder hlui bakah hian thubuai ngai chiah nei Breel Embolo hremna an hlip tel bawk.

Switzerland team director Pierluigi Tami chuan, "He thuchhuah siam tur hian ngaihdan hrang hrang kan la khawm a, thutlukna siam tur hian zirchianna pawh kan nei nasa hle. November-a Xhaka koh let leh hi thil ṭha ber niin kan ngai," a ti.

Xhaka leh Embolo hremna hi hlip mah se Swiss francs 150,000 chawitir an ni tho a, Xhaka hian a tihsual a pawm bakah hremna pumpelh a tum lo a, hei vang hian captain a nihna chu hlihsak a ni lo thung.

September leh tun thla tir lama Nations League khelhah khan Rossocrociati (Switzerland sawina) hian match li khelin an chak vek a, goal 12 khungin goal khat chiah an chhuah. Group E-ah hmahruaitu ni mekin Xhaka leh Embolo tel loin an buai phah lo.