Hma ka sawn zel dawn - Hamilton

Ferrari driver Lewis Hamilton chuan tun hnaiah beisei pha lo mah se tluk hlen a tum lo a, rim taka thawk a hmasawn zel a tum thu chanchinbumite a hrilh.

Kum 41 mi Hamilton chuan, "Intlansiak hnuhnung pangaah khan point ka hloh nasa a, tlan chhe lo mah ila kei aia tiṭha leh vannei zawk an awm avangin tih theih ka nei lo.

Mahse kan team hian hmasawnna awm turin theihtawp an chhuah a, kan ṭhat tawk lohna lai hmuh chhuah tumin an bei mek. Hma kan sawn zel dawn avangin Mexican Grand Prix-ah a hma aia result ṭha kan hmuh ka beisei," a ti.

British driver Hamilton hi United States GP-ah khan palina niin podium a lawn pha lo a, Singapore GP-ah phei kha chuan parukna a ni pha ṭawk. Intlansiak pahnihah hian a teammate Charles Leclerc chu pahnihna a ni ve ve.

Hamilton hian point 241 hmuin drivers table-ah pathumna a ni mek a, vawi khat chak tawhin podium vawi ruk a lawn tawh. Hamilton hi dinhmun chhe taka ding ni lo mah se, a lakah beiseina a san avangin season a hmang ṭha tawk loah ngaih a ni.

Tun season-ah Mercedes driver Andrea Kimi Antonelli a chet ṭhat avangin tluk phak rual a ni tawh lo a, Italian driver hian November 1, Pathianni zana neih tur Mexican GP-ah point li a hmuh chuan a champion thei tawh a, Hamilton tan champion beiseina a bo tawh tluk a ni.