Cagliari dan zawh loh Roma

Tun season-ah AS Roma-in hneh loh nei loin an la kaltluang zel. Thawhlehni zan khan Roma hian Cagliari 4-2 in an hneh. Roma hi table-ah pathumnaah an awm zui zel a ni.

Cagliari-in khualmualah goal an khung hmasa zawk a, M'bala Nzola chuan minute 10-na lekah penalty aṭangin an hmahruaina goal a khung. Mahse Roma-in an chhang let ve nghal a, Emanuele Lulli chuan minute nga hnu lawkah an siphurh sutna goal a tauh lut.

Roma an phur chhunzawm a, minute ruk hnu lawkah Niccolo Pisilli chuan chiang zetin an hmahruaina goal a khung. Roma-in inkhel an thunun chhunzawm a, mahse goal a lut lawk tawh lo.

Minute 81-naah goal a lut leh chauh a, a khungtu chu Daniel Maldini a ni. Paolo Maldini fapa hian tawih zetin an siphurh a sut a, tun season Serie A-a a goal ngana niin Cagliari tan beiseina thar a siam.

Mahse Italian midfielder hi Roma chhiah kawlhtu mai a ni a, mual neitu team tan Rodrogo Mora-a'n tauh lut chhunzawmin hma an hruai leh nghal a, Donyell Malen-a'n tun season-a a goal sarihna khungin an chakna a nemnghet.

Serie A season kal mekah Roma hian Lazio leh Inter Milan chiah an tluk lo a, club pathumte hi hneh loh nei loa kal mek awmchhun an ni.