Dinthar record a ṭha zawk!

Chanmari FC hi MPL club zinga Indian Football League khel awmchhun an ni tawh a, an player neih dan thlirin Dinthar FC chunga leng tura ngaih ni mah se tun season bikah erawh Maimawms an chungnung.

Kumin I Day Football-ah Dinthar hian July 27 khan 3-1 in Chanmari hi an hneh a, hemi ṭuma player of the match Lalbiakzuala chu Maimawms tan a pawimawh chhunzawm zel.

September 5, Inrinni khan Durtlangah an intawng leh a, Dinthar hi 2-1 in an chak nawn. Goal hmahruai khungtu Jerry Lalchhanchhuaha leh man of the match-a thlan PC Rosangzuala te chu final an luh theihna atana Mizoram Police lama goal khungtute an ni.

October 2, Zirtawpni tlaia an intawn ṭumah Chanmari an chak ta thung. Lalthanzuala'n goal awmchhun a khung a, man of the match-ah Chanmati defender F. Lalchhanchhuaha thlan a ni. Tza leh F-a te hi Chanmari tan an pawimawh hle.

Tun season Zo Clasico match thum khelh tawhah Dinthar an chungnung zawk a, an intawn hnuhnun berah Chanmari an chak thung. Steven Dias-a kaihhruai Chanmari hi an squad a chhah avangin an buk a rit hret a, mah se Dinthar hi tualchhung football hre chiangtu K. Malsawmkima (Mala) leh Laldampuia te enkawl an ni.