A kawnghren humhimtu Eli

Nulaihawl inchaiah Elizabeth Rohlupuii chuan a vawi hnihna atan title kawl lai a humhim a, Bawngkawn West nula hian chungnung takin Ruthi Lalhruaitluangi a hneh.

Kum 23 mi Rohlui hi Ruthi-i'n a el phak meuh lo a, round tinah vawi 10 chhiar thlengin Rohlui'n a bawhbet vek. Round hnihnaah a zangthal zawnga a bawhbeh hmain a nawr chhuak tel a, point 11 hmuin round dang zawngah point 10 vek a hmu

Title Fight-a a inlan vawi khatnaah kum 17 mi Hruaii ruh a la no deuh a, round thumna hnuah phei chuan awmze neiin a bei let thei tawh lo. Kolasib tleirawl hi tawnhriat a ngah tawk lohna a lang a, bawhbeh awlsam taka a chet avangin a tlawm zawkah a ṭang.

Champion lai Eli hian engtikah emaw nulianah insawn a rilruk thu Vanglaini a lo hrilh tawh a, mahse a title a humhim theih loh chuan lak kir leh phawt a duh thu a sawi. A kawnghren a hum theih avangin nuliana a insawnna chance a sang tawh hle.