India U15 tan Mizo an vul

FIFA Under-15 World Cup-ah match hnih a zawna an tlawm hnuin India an tho ve leh ta a, Mizo naupang pathum telna India hian 3-2 in Trinidad & Tobago chu an hneh–India goal khung pathum hi Mizo player-te khung vek a ni!

Trinidad & Tobago hian India lakah 2-0 in hma an hruai hman a, Jaylon Carrington chuan minute rukna lekah goal hmahruai khungin, Djoshua Cyrus chuan minute 18-naah a khung belh–India an tlawm nawn ngei dawn niin a lang hman.

Mahse, India U15 tan Mizo naupang an inlar a, an tlawm ve duh lo–Victor Lalawmpuia chuan innghahna tlak a nihzia pholangin, India tan goal hnih a rawn khung a, tun tournament-a goal khung thei tak R. Lalremruatfela'n chakna goal a khung zui bawk. Mualṭhuam North naupang Remrema hian goal ruk a khung der tawh!

Ruallung naupang Victor-a hian hattrick siam theihna chance a nei hial a, mahse, a vanneih zan a ni lo–Remrema siamsak chu uiawm takin goal-ah a chantir thei lo a, India erawh an chak ta tho. Victor-a leh Remrema bakah India U15 tan hian C. Lalhmingropuia chuan inkhel bul a ṭan bawk.

India hian nimin khan Tier C Round of 16 (lower bracket) ah Afghanistan an hmachhawn leh a, 2-1 in an chak zo lo thung. Afghanistan lakah Mizo player pathumten bul an ṭan vek a, an goal awmchhun hi Remrema assist a ni nghe nghe. Nizan dar 7:45 khan India hian Kazakkhstan an hmachhawn leh nghal a, an result kan hre hman lo.