Delhi lakah Goa an vannei

Nilaini zan Indian Super League inkhelah FC Goa leh SC Delhi te chu 1-1 in an inhnehtawk a, Goan club an vannei - 1-0 in an hnufual reng a, an tlawm tawh mai dawn emaw tih hnu, hun pek belh minute nganaah Alex Vallejo chuan si phurh sutna goal a khung a, team pahnih an inhnehtawk.

SC Delhi tan Juan Sebastian Pena chuan minute 51-naah goal hmahruai a khung a, Goan club hian a chhanletna tur an nei thei lawk lo. Mahse, Vallejo-a'n mahni muala tlawm mai chu duh loin, hun pek belh minute nganaah si phurh a sut a, point an hlawh chhuak!

Chanmari FC aṭanga FC Goa zawmtu KC Malsawmsanga'n Goa tan inkhel bul ṭanin, ISL-a a goal hmasa ber khungah a inngai hman a, mahse, offside vangin pawmsak a ni lo - Sawmsanga a vanduai takzet a, ISL-a a goal hmasa ber tur a la nghah leh hret a ngai.

Goan club tan Sawmsanga bakah Isak Vanlalruatfela a inlan bawk a, Thingsulthliah/Bawngkawn tlangval hi second half ṭantirah luhtir a ni. SC Delhi lamah dan pangngaiin Lalrinliana Hnamte (Terina) chuan inkhel bul ṭanin, Augustine Lalrochana chu bench aṭangin a lut bawk.

Nizanah ISL inkhel a awm lo a, zanin dar 7:30-ah NorthEast United chuan Bengaluru an mikhual dawn thung. Beisei aia season bul ṭan ṭha Highlander-ah hian Lalrinzuala leh Mark Zothanpuia an kawl a, Bengaluru-ah keeper Lalthuammawia Ralte leh midfielder ṭhangduang Lalremtluanga Fanai te an awm thung.