Sesko a chawl rei dawn

Manchester United striker Benjamin Sesko chu a ngal hliam vangin January thleng a chawlh a ngai dawn niin khawthlang media-te chuan an tarlang a, United medical team-ten tun hnaia uluk zawka an zirchian hnuah chawlh a la mamawh tam niin an sawi.

Slovenian striker hian September 16 khan Brighton & Hove Albion hmachhawnin, League Cup-ah United tan a inlan a, mahse, hemi hnuah hian a hliam vang hian a inlan leh tawh lo.

Sesko hian season hmasa khan tuna a hliam neihnaah hian hliam a lo nei tawh a, mahse, Champions League khelh tum United-in an mamawh avangin, hliam nei chung hian hun engemaw chen chu a inlan lui.

Mahse, May thlatira Liverpool an mikhual ṭumin Sesko hi a hliam a nat belh a, a hnua United match thumah a inlan leh tawh lo. United chuan an player hi a hliam zai ai chuan, hahdamtira enkawl chi zawk niin an hria a a, pre-season match-ah te pawh khan a inlan miah lo.

Season ṭan a ni a, Sesko hmuh zeuh chang awm mah se, a la inlan tam thei rih lo a, tunah chuan season chanve deuhthaw a chawlh a ngai dawn niin a lang ta. Sesko hian season hmasa khan United tan goal 12 a khung a, tun season-ah match ruk a khelh aṭangin goal hnih a khung tawh bawk.

Sesko hi United a zawm hma hian hliamin a tibuai ngai meuh lo a, mahse, Red Devils a pan hnuah a vanduai hle. Manchester United hi striker mumal neih loh avangin an talbuai mek a, an result a la chhe rih hle.

Premier League-ah match riat khelh tawh aṭangin vawi khat chiah an la chak a, Champions League match thum khelh tawhah vawi khat chiah an la chak bawk - goal khung thei striker an mamawh hle.