Mesut Ozil kalna tur a chiang ta

Arsenal-in March 2020 hnu lama Mesut Ozil an chhawr duh loh hnuah Germany international hlui chuan chhuah zai a rel ta a, buaina chinfelin a awm dawn. Real Madrid midfielder hlui hian Turkish club Fenerbahce a zawm ang.

Turkish club Fenerbahce chuan, "Instanbul-ah Mesut Ozil kan hruai thleng, transfer chungchangah tihfel tur a la awm," tiin thuchhuah an siam. Ozil hian ama official twitter-ah Fenerbahce thuchhuah hi a pholang a, Turkish club scarf nena a thlalak a pholang. 

Kum 32 mi Ozil hian manager Mikael Arteta hnuaia match 10-ah bul a ṭan a, amaherawhchu nikum March 7-a West Ham 1-0 a an hneh hnuah a inlan tawh lo. Tun season-ah phei chuan Ozil hi Premier League leh Europa squad-ah telh a ni lo a, khelmualah hmuh tur a awm lo.

2014 FIFA World Cup-a Germany champion puitu Ozil hian January 2018 khan Arsenal-ah contract pawtseiin club chanchina hlawh tam ber a ni a, kar khatah £350,000 a hlawh anga sawi a ni. 

Ozil-a contract neih lai hi tun season zawha tawp tur a ni a, amaherawhchu London club nen an intih thiam loh avangin a thlawnin Turkish club hi a pan ang.