Leicester City hmaah Chelsea

Zanin dar 1:45 hian King Power Stadium-ah Leicester City leh Chelsea te an inkhel dawn. Season ṭan hmaa pound maktaduai 200 chuang hmangtu Blues aiin Foxes an che ṭha zawk a, Frank Lampard-a hote tan fiahna ṭha tak a ni ang.

Leicester manager Brendan Rodgers chuan, "Sum hmang tam lo mah ila khelmualah team liante kan elpha a ni," tiin a sawi tawh a, Liverpool manager hlui thusawi hi a dikna a tam hle.

Match 18 khelh zawhah Foxes hian point 35 an hlawh chhuak a, champion lai Liverpool (34 pts) ai pawhin point an hmu sang zawk. Chelsea erawhin point 29 an hmu a, point ruk zetin

Leicester an pha lo a, zanin hi a inkar tih zimna hun ṭha a ni ang.

Chelsea hian an  match hnuhnung berah Fulham 1-0 in an hneh a, Lampard-a hote inchhuang thei an ni lo. Blues hian palyer 10-a khel Fulham lakah goal khat an khung hram a, goal chhuah lo mah se an tlarhnung a nghing nasa hle.

Amaherawhchu team pahnih inhmachhawnna hnuhnung 17-ah Chelsea an chungnung hle. London club hian vawi 10 hnehna an chang a, vawi hnih chak loin vawi nga an inhnehtawk.

Midfielder thawkrim N'Golo Kante hliam vangin a dinhmun a chiang lo a, player dang zawng an dam ṭhat vek avangin Frank Lampard-a'n a duh thlalin player a thlang thei dawn. 

English manager Lampard-a'n defence laia a dah tur hriat a châkawm a; Thiago Silva, Antonio Rudiger leh Kurt Zouma aṭangin a thlan a rinawm. Tlarhma lamah German duo Timo Werner leh Kai Havertz te thlan chiang sa a ni tawh bik lo a, Olivier Giroud pawh Fulham lakah bul a ṭan avangin bench lamah a awm ve thei bawk.

Chelsea ang thoin Leicester City an dam ṭha a; Blues tlarhnung tan James Maddison, Marc Albrighton, Jamie Vardy leh Harvey Barnes te ven ṭhat a ṭul dawn. Foxes hian kumina match thum an khelh tawhah hnehna an la chang vek a, Chelsea aia dah hniam a rem lo.