Anfield-a point hlawh chhuak United an lawm lo

Pathianni zan Premier League inkhelah Liverpool chuan Manchester United an mikhual a, khawvel ngaihven inkhel hian beisei angin inkhel hmuhnawm min chhawpsak lo. 

Anfield-a inkhelah mualneitu Liverpool leh an mikhual Manchester United ten goal khung an harsat ve ve a, 0-0 in an inhnehtawk - United boss Ole Gunnar Solskjaer chuan chak thei dinhmuna an din hman avangin an result-ah a lawm loh thu a sawi. 

Manchester United-in Premier League table chung ber an luah chhunzawm laiin Liverpool erawh Manchester City-in 4-0 a Crystal Palace an sawp bawk avangin palinaah an tla thla a, parukna Everton-in an match khelh zat khel chiah se panganaa tla thla thei dinhmunah an ding bawk!

Liverpool boss Jurgen Klopp chuan, "Chak phu khawpin kan khel a, mahse, hnehna chang tur chuan goal khung a ngaih laiin kan khung lo - hei vang hian draw result kan nei a ni," a ti a, hei hian inkhel dinhmun a hrilhfiah hle. 

Anfield-a inkhel an ni a, an squad enin Liverpool chu United aia dah san tur zawk an ni bawk - hei vang hian Liverpool chu chak tura ngaih an ni a, inkhel ṭantir aṭangin game pawh an thunun nghal.

Mahse, United goal lamah an inkhel bik emaw tih mai tura Reds-in an nawr chungin chance hlauhawm erawh an nei hleithei lo a, Sadio Mane, Mohamed Salah leh Roberto Firmino-te inkawp chu tlarhma naran ang mai an ni. 

Salah-a'n tun aiin a hma sial lo hret se Reds-in goal an khung mai ang em aw, tih tur a ni a, Firmino hi Liverpool game ti famkim turin player ṭha tak ni mah se a finishing lam hi zir belh chu a ngai deuh niin a lang - Fabinho erawh midfielder ni mah se centre back tura duan sa ang maiin a khel ṭha. 

Liverpool-in 7-0 ngawta Crystal Palace an sawp hnuah league match li chhung chu chak an nei tawh lo a, West Brom leh Newcastle United an inhnehtawkpui hnuah Southampton an ngam lo a, United an inhnehtawkpui leh ta - Jurgen Klopp-a'n champion nawn a tum a nih chuan ngaihtuahna sen ṭhat a mamawh. 

Premier League champion Liverpool-in Anfield-ah inkhel an thunun zawk a, chance hlauhawm nei ngah zawk erawh Manchester United an ni - chance aṭanga thlir chuan chak an phu zawk. 

United tan an player chhuanvawr Bruno Fernandes-a'n freekick hmanga a khung loh chu uiawm a tling a, Paul Pogba khung ngei tur nia lang chu keeper ṭhami Alisson chuan a manto chhan pholangin ṭha takin a dang bawk. 

Red Devils-in Anfield-ah bul ṭan ṭha lo mah se an tumah an chiang a, tlarhnung lamah Liverpool an dang hneh hle - a bik takin captain Harry Maguire leh left back Luke Shaw-ten fak an phu a, United defense nghin loh chhan an ni. 

United boss Ole Gunnar Solskjaer-a'n Premier League nomawi chawi a tum a nih erawh chuan tih tur tam tak a la nei tih a lang a, Liverpool tlarhnung phuahchawp Fabinho leh Jordan Henderson an paltlang thei lo kha United tlarhma tan inenfiahna tur darthlalang a tling. 

Liverpool tan hliam vanga la inlan tam lo Thiago Alcántara chuan inkhel bul a ṭan a, Spanish player thiam bik hian fak hlawh ṭhin mah se danglamna a la thlen miau loh avangin Liverpool khelh dan zir belh a la mamawh. 

Thiago hian vawi 121 ball tawh fuh neiin vawi 96 pass a neihah vawi 83 pass dik a nei a, key pass vawi hnih a nei - mahse, he midfielder ball pass rang lutuk leh thiamna hi Liverpool player dang 'skills' in a la phak lo em ni chu aw, tih mai tur a ni. 

Manchester United midfielder Bruno Fernandes-a'n beisei a phak bik lo a, freekick bakah vawi khat Alisson enchhinna nei mah se hemi pahnih lo hi chu a hmel hmuh tur a awm meuh lo. 

Fernandes hian club lian a hmachhawnin a theihna tak tak a pholang thei ṭhin lo a, Liverpool lakah pawh a aia tawnhriat nei ṭha leh thiam zawk Thiago-a'n a ven bawk si avangin a che hleithei lo - tun season-a 'Big Six' a hmachhawn tawhah goal khat chiah khungin assist a la nei lo a, a goal khung hi 'penalty' a ni. 

Team ṭha tak an ni a, inhliam vanga buaina an nei chungin kan chhawr ṭangkai lo thung. Kan khelh rei deuh hnuah hma kan sawn chho a, hnehna chang thei dinhmunah kan ding hman hial a ni.

Kan result-ah mai ni loin khelh danah ka lawm tawk lo. First half-ah khan kan chhaih buai tawk lo a, kan tlarhnung erawhin fak tlaka an khelh avangin Reds khan chance pawh an nei hleithei lo a ni. 

Kan bul ṭan danah kan lung a awi lo tlang a, mahse, chu chuan minti lawm lawi si - khatianga khel chunga lawm loh kha kan tan a ṭha a ni. 

Kan khel ṭha a, a bik takin first half kan khel ṭha takzet. Kan inkhelh hmaa thu leng vak ka ngaihtuah a, United ṭhat thu leh kan talbuai thu an sawi nasa hle - mahse, chuti chunga khati taka kan khel ṭha kha ka lawm a ni. 

Second half-ah pawh theihtawp kan chhuah chhunzawm a, mahse, counter-attacking a ṭha tak United meuh minute 90 vel dan chu thil harsa tak a ni. Chance ṭha tak vawi hnih an rawn nei a, chutihrual chuan keini pawhin kan nei ve tho a ni. 

Game kan hriatthiam dan, thlir dan leh hmuh dan kha ṭha ka ti hle. Chutihrual chuan kan khelh dan tur ang takin kan la khel chhuak lo a, hmasawnna tur hi chu a awm reng a ni - hmasawn kan mamawhnaah kan inzir belh ang. 

*Liverpool leh United-te tun hnai season nga chhungin Anfield-a league match thumah 0-0 in an inhnehtawk a, hemi hmaa top flight match 48-a goal khung loa an inhnehtawk zat nen a inang. 

*Premier League-a khualmuala an match hnuhnung 16-ah United an tlawm tawh lo a, vawi 12 chakin vawi li an khingpui an inhnehtawkpui. September 1999-a khualmuala league match 17 an tlawm loh record nih rual turin match khat tlawm loh chiah an mamawh tawh. 

*Liverpool hi Anfield-a league match an khelh hnuhnung 68-ah an tlawm tawh lo a, point 204 hmuh tur awm aṭangin point 178 an hlawh chhuak thei. 

*United hi October 2018-a Manchester City hnua Anfield-a Liverpool goal khung tur dang tluan thei awmchhun an ni - hetih chhung hian league match 43 chu an mualah an khel hman. 

*Liverpool-in Jurgen Klopp hnuaia Anfield-a Premier League hmahruaitu an mikhual match sarihah tlawm an nei lo vek - vawi thum an chak a, vawi li an inhnehtawkpui.

*Marcus Rashford chu Liverpool lakah khan vawi nga a offside hman a, Premier League tun season-a match khata offside hnem ber record a siam a, January 2013-a Robin van Persie (6 vs Spurs) hnua United player, match khata offside hnem ber record a siam bawk.