Jordan khumtu Luka Doncic

Luka Doncic-a'n a vawi 29 nan NBA-ah triple-double a nei a, player ropui Michael Jordan-a record a khum chiah. Doncic hian record ropui siam mah se Dallas Mavericks a chakpui zo lo, nimin zing khan Chicago Bulls lakah 117-101 in an tlawm.

Mavericks guard hian - 36 points, 16 rebounds and 15 assists a nei a, mahse inkhel chawhnu lamah point ruk chauh a neih avangin hun pawimawh laiah a langsar lo, an chak loh avangin a lawm a kim lo ang.

Slovenian tlangval, kum 21 mi Doncic chuan, "Second half ka khel chhe takzet, hun chanve hma lamah point 30 ka neih tawh avang khan a hnu lamah khan hma ka sial deuh niin a lang. A hnu lama ka khelh dan kha chu tih chhunzawm chi a ni lo ang," tiin a sawi.

Basketball inelna sangah hian triple-double neih tam lamah Doncic hi 15-na a ni ta chiah a, record nei ṭha ber Cincinnati Royals leh Milwaukee Bucks player hlui Oscar Robertson chuan vawi 181 zet a nei thung!