Puipuia'n chiang takin a title hum

MBOCWWB Rahbi Chhertu Mizo Inchai Title Fight 2026 zan hnihna chu Ningani zan khan neih a ni a, palaihawl inchaiah champion lai Remruatpuia chuan chiang takin a title a hum a, a kawnghren chhuhsak tumtu Ramropuia lakah 73-1 a chakin harsatna a tawk lo.

Round 10 an inchai hnuah Bethlehem Vengthlang tlangval Puipuia a chungnung tluan zak a, vawi nga Ropuia bawhbet theiin, vawi sawm an chhiar thlengin a behtir thei.

Kum 25 mi Puipuia hi tawnhriat nei ṭha zawk a nih bakah tharum a ngah zawk tih a lantir a, Mamit tlangval Ropuia a bawhbeh bakah a pawm kang thei a, a pu fo bawk.

Hetihlai hian title fight a hmachhawn hmasak berah Ropuia'n beisei a pha lo a, a tawp lamah a mualpho lutuk tur hliahkhuh nan point khat a sual chhuak thei hram. Kum 33 mi Ropuia hian Puipuia tan harsatna a siam thei meuh lo a, round kuanaah inveng tluanin round dang zawngah Puipuia'n point a hmu vek.