Veni hneh theitu an awm lo

Nute inchaiah Lalvenhimi chuan Ningani zan khan C. Lalrinfeli hnehin a title a humhim a, Veni hi kum 11 chhung champion niin 2014-a a champion hnuah hneh theitu an la awm lo.

Inchai an ṭan aṭangin a nawrtuah Veni a ṭang nghal a, mahse a tir lamah a khel ṭha tawk lo a, chetsual a nei zeuh zeuh. Chutihrualin tawnhriat a ngah avangin a insiamrem thei nghal zel.

Round nga an inbeih chhungin Veni hian ṭum li lai vawi 10 an chhiar thlengin a bawhbet thei a, Bethlehem Veng nula hi amah aia kum 12 zeta naupang zawk Rinfeli lakah a chungnung - harsatna liam tham a tawk lo.

Veni hi nulian huangah pawh a lo champion tawh a, nulian huanga kg70 chung lam chauh tel theihn dan an siam hnuah nuteah a vawk lal len a, amah el phâk an awm meuh lo.

Kum 18 mi Rinfeli erawh a title fight hmachhawn hmasa berah a chak zo lo a, mahse Lunglei tleirawl hian tawnhriat ngah Veni lakah beiseiawm takin a khel a, a hma hun a êng hle.