Perfect hattrick siam Ronaldo

Cristiano Ronaldo-a'n Ballon d’Or of All Time (BOAT) a dawn lawm nan Al Nassr tan hattrick a siam a, hattrick satliah a ni lo - perfect hattrick ngat a ni bawk. Football-ah match khata goal thum khung hi hattrick tih a ni a; lu, ke dinglam leh ke veilama goal an khung a nih chuan perfect hattrick tih a ni.

Al Nassr hian Ningani zan khan Al-Kholood Club an mikhual a, 5-3 in an chak. Mualneitu tan Angelo Gabriel leh Sadio Mane ten first half-ah goal an khung a, halftime-ah 2-2 a ni.

First half-ah Ronaldo a vannei tawk lo a, a goal khung an pawmsak lo. Second half-ah kum 41 mi Ronaldo-a'n a theihna a rawn lantir a, perfect hattrick a siam. Portuguese forward hian a career-a perfect hattrick a siam vawi 11 a ni a, hattrick hrim hrim erawh vawi 67 zet a siam tawh.

Ronaldo hian a career-ah goal 983 a khung ta a, goal 1000 tlin turin goal 17 chiah a mamawh tawh. Tun ang renga goal a khung a nih chuan tun season-ah ngei Ronaldo hian goal 1000 hi a tlin thei ang.