City leh Brighton intawng leh dawn

Premier League hmahruaitu Manchester City chuan zanin dar 8:30 hian Brighton & Hove Albion an mikhual dawn a, team pahnihte hi League Cup-a inhmachhawn zo hlim an nih avangin inkhel hmuhnawm a beisei ngam.

Nilaini zan khan City leh Brighton hi Etihad Stadium-ah an inhmachhawn tawh a, Mateo Kovacic hmanga City-in hma an hruai hnuah Malick Yalcouye leh Georginio Rutter ten Seagulls tan khung ve lehin hma an hruai. Vitor Reis chuan Citizens tan an siphurh sut lehin penalty-ah mual neitu team hi 4-3 in an chak zui.

Ni thum hnuah an intawnna hmun ngaiah bawk an intawng leh dawn a, Fabian Hürzeler-a hote hian chak loh nawn an duh tawh dawn loh avangin theihtawp an chhuah tawh ang.

Tun season-ah Seagulls hi beisei phâk bakin an che ṭha a, pathumnaah awmin City leh Arsenal chiah an tluk lo. Zaninah pawh Pascal Gross, Charalambos Kostoulas leh Jack Hinshelwood te hoin City hneh an tum ngam ang.

Hetihlai hian City hian League Cup-a Brighton an pet chhuah ṭumin an rinrawl player tam zawk an hahdamtir a, chuti chung chuan hnehna an chang thei tho. Zaninah League Cup-a inlan lo Erling Haaland-a'n bul a ṭan leh ngei ang a, Elliot Anderson leh Iliman Ndiaye te chhawr theihin an awm tawh dawn bawk a, Enzo Maresca naute hi a buk rit zawk an la ni tho.