Ronaldo hoin Juventus an tlawm Champion tum ngam Inter Milan

Juventus tan Serie A nomawi humhim a harsa tawh dawn. Antonio Conte kaihhruai Inter Milan lakah Cristiano Ronaldo awmna Old Lady 2-0 in an tlawm a, champion lai hi palinaah an awm.

Pathianni zan inkhel dangah Napoli chuan an mikhual Fiorentina 6-0 zetin an sawp a, Gennaro Gattuso naute hian point 34 neiin pathumna dinhmun an luah - nizan zanlai khan hmahruaitu AC Milan an inlan ve thung.

Inter Milan leh Juventus inkhel hi 'Derby d’Italia' a ni satliah lo, season tawp a nomawi chawi tur zawk zawnna pawimawh tak a ni tel nghal - season dang zawng aiin 'Scudetto' inchuh boruak a sang zel dawn.

Inter lamin hliam leh hrem vanga chhawr theih loh langsar an nei lo a, striker Romelu Lukaku chu bul ṭantu zingah a tel thei leh tawh bawk. Arturo Vidal chuan a club hlui hmachhawnin inkhel bul a ṭan bawk.

Andrea Pirlo erawhin Covid-19 kaihhnawih vangin Matthijs de Ligt, Alex Sandro leh Juan Cuadrado te a chhawr thei lo, forward Paulo Dybala chu hliam vangin a inlan thei lo bawk - an ṭhat dan berin an khel thei lo.

San Siro chhungah fans lut thei lo mah se a boruak sanna a nep phah chuang lo. Stadium pawnah Inter ṭantu ruhkawl an pungkhawm, inkhel bul ṭan tir lam aṭangin halmawi leh puak thei a ri nasa hle.

Juve lamin hun ṭha an nei hmasa, midfielder Adrien Rabiot-a shot chu keeper Samir Handanovic-a'n rang zetin a lo dang a, ball per hi Ronaldo-a'n khung mah se a bula ding Federico Chiesa chu a lo offside hman avangin an pawm lo thung.

Old Lady tana Serie A nomawi vawi li chawi tawh Arturo Vidal a inlar zui. Chile international hian Nicolo Barella-a cross chu chiang zeta tauh lutin minute 12-naah goal hmahruai a khung, hun chanve hma lamah goal dang a lut zui tawh lo.

Lukaku leh Lautaro Martinez ten hun ṭha an chhawr ṭangkai thei lo a, keeper Wojciech Szczesny a khel ṭha bawk. Minute 52-naah defender Alessandro Bastoni chuan hla tak aṭangin through ball ṭha bik a pet thut.

Ball dawngtu Italian midfielder Barella-a'n tawite a tlanpui leh zeuh hnuah chiang takin a hlap lut - Szczesny tan dan theih a ni lo. Hun tawp dawnah Federico Chiesa chuan khung theihna hun nei ve mah se hnai tak aṭanga a pet chu Handanovic bawkin a lo dang.

Juventus a enkawl laia Serie A vawi thum champion tawh, tuna Inter manager ni lai Conte chuan, "Juventus ang team ṭha hneh tur chuan a ṭha thei ang bera khelh ngei ngei a ngai. Chutiang tur tak chuan kan khel chhuak a, ka naute hnathawh kha a ropui hle.

"Season hmasa pawh khan beiseina sang tak kan nei tawh a, chutiang bawkin kuminah pawh beiseina kan nei leh. Thamral loa a tak chantir kan tum ang," a ti. Inter hian September, 2016 hnua a vawi khat nan San Siro-ah Juve an hneh leh chiah.

Juventus manager Pirlo chuan, "Kan rilru put hmang kha a dik tawk lo a, a tir lama hun ṭha kan khawhral bakah ven theih tura ngaih kan veng thei lo khan min nghawng niin a lang. Inter lamin min nawr a piang kha a hlauhawm zel, khatiang kha chu a thleng nawn tawh lo ang.

"Inkhel ṭhenkhatah chuan player mala ṭha neih a pawimawh ṭhin, a chang chuan team pumpui anga khelh a ngaih chang a awm bawk. Inter laka chak tur chuan kan zavaia kan khelh ṭhat vek a ngai tih a lang chiang," tiin a sawi.