Zaninah Milan derby awm dawn

Italian football-a club lian pahnih Inter Milan leh AC Milan te chu zanin dar 1:30-ah an inhmachhawn dawn a, club pahnihte hi tun hnaiah inthlau deuh mah se derby a nih avangin boruak a sang leh dawn.

Hello Inter

Serie A champion lai Inter hi tun season-ah pawh an che ṭha a, Lazio nen point hmuh zat inangah goal an khung hnem zawk avangin hmahruaitu an ni a, match kua an khelh tawhah hneh loh an la nei lo.

Tun season-ah pawh Cristian Chivu naute hi champion tura rinkai an ni leh der tawh a, an player neih dan leh an khelh tawh dan thlirin thil fans-in beisei an nei sang hi thil mak a ni lo.

Chutihrualin Inter hian an striker chhuanvawr Lautaro Martinez chu an chhawr theih a la rinawm loh a, Argentine forward tel loa an hmelma an hmachhawn a ngai dawn. Mahse Pio Esposito, Marcus Thuram leh Ange-Yoan Bonny te an la neih avangin hlauthawng lutuk tur an ni bik lo.

Martinez bakah hian hliam vangin Luis Henrique, Benjamin Pavard, Curtis Jones leh John Stones te an chhawr thei dawn lo bawk a, tlarhnunga an ban rinawm Alessandro Bastoni chu Shakhtar Donetsk lakah red card hmu mah se Serie A-ah erawh a hremna hi a nung ve dawn lo thung a, bul a ṭan a beiseiawm.

Milan ve hi

Ruben Amorim-a enkawl Milan erawh October 28, Nilaini zan khan 4-2 in Bologna chu an mualah an hneh lo a, tun season-a an tlawmna hmasa ber a ni. Ni thum hnu lawka an hmelma laka tlawm nawn an duh dawn loh avangin chak turin theihtawp an chhuah ang.

Inhliam vangin Milan hian Alexis Saelemakers, Matteo Gabbia, Pietro Terracciano, Ruben Loftus-Cheek, Samuel Chukwueze, Adrien Rabiot, Diego Moreira leh Mario Gila te an chhawr theih a rinawm loh.

Milan forward te an chet ṭhat tawk loh avangin goal khungtu bik an nei lo a, club tana tun season Serie A-a goal khung hnem ber Rabiot (4) leh Moreira (3) te an inhliam avangin Amorim-a lu a hai khawp ang.

Chutihrualin rawlthar Alphadjo Cisse a la awm a, kum 19 mi Italian forward hian goal li khung tawhin zaninah a mawhphurhna a sang dawn a, Christian Pulisic, Goncalo Ramos leh veteran player Luka Modric te an chet ṭhat a pawimawh bawk ang.