F1-ah keimah ang an awm lo - Hamilton

Ferrari driver Lewis Hamilton chuan Formula 1 chanchinah amah ang an la awm loh thu a sawi a, Africa-a intlansiak a duh avangin F1 aṭanga chawlh mai a la tum loh thu a sawi bawk.

Kum 41 mi Hamilton chuan, "F1-ah hian kum 70 chhungin keimah ang hi an la awm ngai lo a, tun season-a kan intlansiak tawhna in en a nih chuan driver naupang zawkte ai pawhin ka la ṭha tih in hmu thei ang.

Africa-a intlansiak hi ka châk a, kum 2030 thleng he inelnaah hian ka awm zui zel ang em, tih chu hunin a la hril ang. Ka kum tam ve deuh tawh mah se ka thiamna hmangin min ringhleltute hmui ka hupsak ṭhin a, chutiang thil tih chhunzawm zel chu ka duh dan a ni," a ti.

F1 hian Rwanda nen kum 10 daih contract an ziak thar a, kum 2030 chawhma lamah hian 1993 hnua a vawi khatna atan Africa khawmualpuia F1 intlansiak awm turin ruahmanna an siam a, hetah hian Hamilton chuan tel a la tum.

British driver hi tun dinhmunah F1-a driver upa ber dawttu a ni a, kum 46 mi Fernando Alonso chauh chu ani aia upa awmchhun niin Aston Martin nen an thawk dun mek.

Hamilton hian tun season bul a ṭan ṭha tawk lo a, mahse driver's table-ah pathumna dinhmun a la luah pha tho. A chungah Mercedes driver pahnih Andrea Kimi Antonelli leh George Russell te chiah an awm.

Tun season-ah Antonelli a che ṭha fal a, Pathianni zana neih tur Mexican GP-a champion thei turin point li chiah a mamawh a, Hamilton leh Russell an tlan ṭhat tawk loh phei chuan intlansiak zawh hmain a champion thei dawn.