East Bengal leh Bagan an vannei

West Bengal sorkar chuan Indian Super League club pahnih, East Bengal leh Mohun Bagan te chu Salt Lake Stadium hman man an laksak tawh dawn lo a, ISL match khelh leh tur an neih hoah Salt Lake Stadium hi a thlawn vekin an hmang thei tawh dawn a ni.

Salt Lake Stadium hman man hi chiang taka tarlan a awm lo a, season hmasaa East Bengal thuneituten buaina an tawh khan, stadium hman manah, match khata cheng nuai 1.5 an chawi thu an sawi a, a hnuah a hun laia West Bengal sorkar khan tihhniam sakin, a hmingin match khatah Rs. 15,000 an chawi.

Mahse, Salt Lake Stadium hi a khelmual hawh man piah lamah security, lights, logistics leh thil dang dangah sum sen belh tur a la awm a, ISL match khat khel tur hian club-in cheng nuai 25 vel an seng tlangpui nia sawi a ni bawk.

Tuna West Bengal sorkar thuchhuaha a lan dan chuan, stadium hawh man hi free tur a ni dawn a, club dangin thil dang neuh neuha a sum sente erawh a la ngai reng dawn tho niin a lang.

ISL club Mohun Bagan chuan zanin dar 7:30 hian Punjab FC an mikhual dawn a, stadium hawh man an chawi tawh dawn lo - Kolkata club-ah hian Lalengmawia Ralte (Apuia) leh Lallianzuala Chhangte an awm mek.

Vawiin tlai dar 5:00-ah PC Laldinpuia, Ayush Chhetri leh C. Lalhriatpuia te khelhna Chennaiyin chuan Kerala Blasters an mikhual dawn a, Kerala hian Freddy Lallawmawma, R. Lalthanmawia, Paul Ramfangzauva, Joel Lalramengmawia leh Ramhlunchhunga te an kawl.

Pathianni tlai dar 5:00-ah Hmingthanmawia Raltea, B. Lalnuntluanga leh Zothanpuia te khelhna Mumbai City chuan SC Delhi an mikhual dawn a, Delhi club-ah hian Lalrinliana Hnamte leh Augustine Lalrochana an awm.

Inkhel hnuhnung zawk, Pathianni zan dar 7:30-ah Laldinliana Renthlei awmna Inter Kashi chuan FC Goa an mikhual dawn a, Goan club hian Jerry Lalrinzuala, Isak Vanlalruatfela leh KC Malsawmsanga te an kawl.