France FA-in Mbappe an chhan

France Football Association president Philippe Diallo chuan China mipuiin an huatnaah Kylian Mbappe lam a ṭang a, French forward chu season a hman mekah a insawrbing theih nan engkim chu theihngilh ṭha a ti.

Diallo chuan, "He thil hi thleng lo tur a ni a, Mbappe pawhin a tum reng vanga mi pawi sawi a nih loh thu a sawi a, ngaihdam a dil tawh bawk. Chuvangin Mbappe-a'n tun season atana a khelh hmabakah a insawrbing theih nan, he thil hi sawi zui tawh loa kan theihnghilh a ngai," a ti.

Tun kar tir lam khan Mbappe hian Mao Zedong anga a thlalak an siam danglam chu a hlimpui thu a sawi a, Chinese dictator tia a sawi chu China mipuite an lawm lo a, sumdawng ṭhenkhatin an thawhhona an titawp hial.

Kum 27 mi Mbappe hian ngaihdam a dil zui a, mi rilru tihnat a tum loh thu leh a thilsawi avanga a inchhir thu a sawi tawh. A khelh mekna Real Madrid chuan China mipui lakah ngaihdam a dilsak bawk.

Paris St-Germain forward hlui hi Ballon d'Or sem zawh takah khan pahnihna dinhmun a luah a, Harry Kane chiah tluk loin a hnuaiah Lamine Yamal a awm ve bawk.

October 25, Pathianni zana El Clasico-a chakna goal a khung hnuah Mbappe hian buaina hi a tawk leh a, Pathianni zan dar 8:45-a Racing Santander an lenchilh hunah a nghawng a nih pawhin a mak dawn lo - Mbappe-a'n en bik a hlawh dawn.