Axelsen a thiam ber
Thailand Open Super 1000 badminton tournament khelh zawh takah Viktor Axelsen a champion. Hmeichhe inelna lamah Carolina Marin chuan nomawi a lo chawi tawh bawk a ni.
Pathianni zan khan mipa singles final khelh niin, world number 1 hlui hian a khingpui Hong Kong tlangval Angus Ng Ka Long chu 21-14, 21-14 a hnehin a chungnung ber dinhmun a luah.
Denmark tlangval hian nikum March thla khan All England Open nomawi a lo chawi tawh a, hri leng vanga hun rei tak an inkhelh theih loh hnuah an lo kir leh a, tournament lian a khelh lehna hmasa berah hlawhtlinna a chang leh nghal a ni.
Kum 27 mi Axelsen chuan, "Hun rei tak hnua tournament khel leh chauh ka nih avangin a awlsam lo, 100% chuanga ṭhain khelh a ngai tih pawh ka hria. Beisei phak baka ṭhain inelna ka hmachhawn thei hi ka lawm takzet," a ti.
Nipui laiin Tokyo Olympic neih a ni dawn a, inelna ngaihhlut zinga mi badminton huangah inelna a sang dawn. Lin Dan leh Lee Chong Wei an chawlh tawh avangin player dang tan medal lak theihna kawng a inhawng zau deuh dawn niin a lang.
Pathianni tlai hmeichhe singles final-ah Marin hian seeded pakhatna Tai Tzu-ying chu minute 42 chhungin 21-9, 21-16 in a hneh.
Thailand Open champion
Men's Singles Viktor Axelsen
Women's Singles Carolina Marín
Men's Doubles Taipei Lee Yang
Wang Chi-lin
Women's Doubles Greysia Polii
Apriyani Rahayu
Mixed Doubles Dechapol Puavaranukroh
Sapsiree Taerattanachai