United an tlawm leh tawh!

Manchester United-in chak dan an theihnghilh tawh - Inrinni zan khan Chelsea lakah 2-0 in an tlawm leh ta a, inelna hrang hrangah match kua zet chu a zawnin an chak zo ta lo!

Chelsea tan Morgan Rogers leh Cole Palmer (penalty) ten goal khat ve ve an khung a, minute 63-naah United defender Lisandro Martinez chuan ât soin, hnawhchhuah a ni - United-in an tuar.

United hi table-ah 17-na niin, relegation zone-a awm Crystal Palace nen an point hmuh zat a inang - United chak loh zanah ṭhenawm club Manchester City an chak zo bik lo a, 1-0 in Brighton & Hove Albion an ngam lo.

United = zero

Stamford Bridge-ah Manchester United-in hnehna chan tumin an khel a, an hmuhnawm hle. Mahse, coach Michael Carrick a sawisel hnua a vawi khat nana bul ṭan Bruno Fernandes-a'n a thusawi a um phak lo a, Bryan Mbeumo siamsak chu uiawm zetin goal-ah a chantir thei lo.

United tan Bruno siamsak chu Mbeumo-a'n goal ruakah a tlawh lut hman bik lo a, Amad Diallo pawhin chance duhawm vawi hnih ngawt nei mah se, engmah lo maiah a chantir bawk.

Red Devils hlim lai ber chu Matheus Cunha-a'n goal a khung emaw a intih lai chu a ni a, an lam nasa hman hle. Mahse, video assistant referee a inrawlh hnuah offside vangin pawmsak a ni lo.

A tawpah Chelsea

United-in first half an khel ṭha zawk a, Chelsea fans an lawm lo. Second half-ah mualneitu team danglamna kan hmu zui a, Chelsea-in goal hnih an khung - United-in red card an hmu thung.

Minute 50-naah Morgan Rogers chuan ṭha zeta ball tlan puiin, United tlarhnungin an thlir a, an tih tur an ti lo - English midfielder hian hahdam takin goal hmahruai khung nan a hmang.

Minute 63-naah Martinez-a ât a chhuak a, Wesley Fofana a nghawk lui. Hnawhchhuah a ni a, penalty a chawi bawk- Palmer chuan goal-ah a chantir a, Chelsea an chak a, United erawh an talbuai chhunzawm zel.