Nagaland tan Mizo tlangvalte an vul

Indian Football League chu October 30, Zirtawpni zan khan khelh ṭan a ni ta a, Srinagar-ah club thar Nagaland United chuan Real Kashmir 3-1 in an sawp. Nagaland United hi Mizo hlangin an khel a, a tawi zawngin MPL13-a Aizawl FC player-te an ni.

Nagaland United hian Naga player paruk vel ziah luh tum mah se IFL-a tawnhriat an la neih tlem avangin an tisual. IFL player-te hi AIFF consent form-ah professional player anga ziah luh tur a ni a, amateur player anga an ziah luh avangin January transfer-ah chauh an ziak lut thei ang.

TRC Football Stadium-a inkhelah MPL-a Aizawl FC tana che ṭhate bawk Nagaland tan an che ṭha a, Khuangchawi thla ṭantirh lama che ṭha ṭan JH Remlala a rawn vul chhunzawm a, minute thumna lekah Champhai tlangval hian a khung. IFL-a tawnhriat nei ṭha Vanlalhriatzuala'n a theihna sang tak a lantir a, Real Kashmir defender-ten Khawlailung tlangval hi an chelh lo hle.

Real Kashmir lam technical area-ah Aizawl FC coach R. Lalruatfela a ṭhu thung a, Kolasib tlangval hnathawh ṭhat hi Nagaland United-in an seng. Kolasib tlangval R-a chuan, "Kawng engkimah kan hneh lo. MPL final khelh zanah IFL kan han khel ṭan a, coach tan chuan a uiawm duh hle. Mahse, hei chona thar ka hmachhawn phah. Nagaland United an chet ṭhat avangin Real Kashmir lama kan hotutue pawhin min ngaih pawimawh phah zawkin ka hria," tiin Vanglaini a hrilh.

Real Kashmir-ah Lalrokima leh Lalawmpuia Sailo te bench aṭangin an lut a, Srinagar-a inkhelah hian Mizo player 16 an lut. Aizawl FC awm lo mah se Nagaland United hi Mizo player-a innghat an ni a, IFL-ah Mizo player an la ṭhahnem tho.

Inkhel dangah Shillong Lajong-in ISL aṭanga tla thla Mohammedan SC chu 1-0 in an hneh. Lajong tan Emmanuel Lalchhanchhuaha leh Ephraim Lalremtluanga ten bul an ṭan a, Mohammedan-ah Lalremsanga leh Joseph Lalmuanawma ten bul ṭanin bench aṭangin Lalthankima a lut bawk.

Gokulam Kerala-in IFL club thar Samalewsari FC 3-2 in an hneh. Kerala club tan Lalramsanga'n bul a ṭan a, bench-ah C. Lalchungnunga leh R. Lalbiakliana te an awm. Samalewsari lamah Lalhmangaihsanga (Papuia) leh Fredy Chawngthansanga te bench-ah an awm ve bawk.