AIFF-in Aizawl FC tawp thu a puang; AFC a la tawp lo

Mizoram Football Association-in AIFF aṭanga an thudawn angin thuchhuah an siam a, India rama football thuneitu sang berin Nagaland United hnena an hralh tawh avangin Aizawl FC a tawp tawh thu an tarlang.

MFA hian Aizawl FC dinhmun hi AIFF an zawt chiang a, India rama football-a thuneitu sang ber chuan, "AIFF leh MFA hnuaiah Aizawl FC a awm tawh lo," tiin an chhang. Aizawl FC neitu Robert Romawia Royte chuan mimal suma Indian Football League club enkawl reng harsa a tih avangin Nagaland United hnenah IFL club khelh phalhna an hralh.

MFA lam hian Aizawl FC dilna angin Mizoram aṭanga Nagaland-a awm rem tihna an pe a, CRS nen lam an hralh tel tih erawh an hriatpui lo thung.

AFC neitu RRR-a chuan, "Nagaland United hian an CRS neih sa an hman theih kan beisei a, keini lam pawhin kan CRS hi kan hman chhunzawm theih kan inring. Mahse, AIFF-in an remtih miau loh avangin Nagaland United kutah CRS a awm ta a, hei hi kan hmuh lawk loh thil a ni," tiin an harsatna tawh chungchang Vanglaini a hrilh.

Aizawl FC leh Nagaland United inremna fuh tawk loh avangin Aizawl FC Academy pawhin ADFA First Division semifinal an khelh theih loh phah bawk. CRS tih hi a lam pum chu Centralised Registration System tih a ni a, AIFF hnuaia club-te hi an inziaklut vek.

Aizawl FC hminga CRS awm ṭhin kha, Nagaland United tiin thlak a ni tawh. Nagaland United hian thuneihna pumhlum nei tawhin Nagaland Football Association hnuaiah a awm tawh a, Aizawl FC first team leh Academy hi CRS khat hnuaia mi vek a ni.

AIFF chuan Aizawl FC hminga CRS-a inziahluh a phal tawh lo a, Aizawl FC a tawp tawh. Mahse, CRS-ah hian Aizawl Football Club tia ziahluh theih a la ni a, AFC hian CRS thar neih tumin hma an la mek.

Aizawl FC neitu RRR-a chuan, "CRS-ah a thara inziahluh kan tum a, Aizawl Football Club hming kan put theih kan beisei. AFC hi company (pvt ltd) leh society in kan inziaklut a, company anga kan inziahluhna zawk hi kan hralh a, society anga kan inziahluhna erawh kan hralh tel lo. Society angin kan kal chhunzawm ang a, local football chawi nun zel kan tum," tiin Vanglaini a hrilh.

AIFF-ah Aizawl Football Club hming puin Mizo club hian CRS thar an neih ngei a rinawm a, amaherawhchu club thar a ni tawh dawn a, a neitu ngai a ni ringawt tawh dawn. Tualchhung football ngainatute tana chanchin lawmawm erawh AFC hi a la kal zel dawn a, an awmna tur division/league erawh hunin a rawn hril ang.