Sainunmawia'n gold & silver la

Yonex-Sunrise G.H. Raisoni Memorial All India Junior Ranking Badminton Tournament 2026-ah Sainunmawia a vul a, Ramhlun Venglai rawlthar hian boy's doubles category-ah gold medal lain, mixed doubles-ah silver a la bawk.

October 23-30 inkara Goa-a neih inelnaah, Sainunmawia hi Harishragavendiran Vaithianathan nen boy's doubles-ah ṭang dunin, quarterfinal-ah harsatna an tawk tih loh chu harsatna lian tham an tawk lo a, seeded no 2, Sai Shiddharth Rayaprolu leh Charran Ram Thippana te inkawp chu final-ah hmachhawnin, deciding match-ah 9-15, 15-13, 15-7 in an hneh - Sainunmawia tan national level-a gold a lak hmasak ber a ni nghal.

Pullela Gopichand Badminton Academy, Hyderabad aṭanga inzir, tun hnaia A Zone Academy-a insawn Sainunmawia hian mixed doubles-ah Ishita Negi nen inkawpin, harsatna lian tham tawk loin final an lut bawk.

Final-ah hian boy's doubles lama a ṭanpui Harishragavendiran leh Krithya Siva Sankar-te inkawp an hmachhawn a, set hmasa ber la mah se, a tawpah deciding game khelh ngaia awmin, match hmuhnawm takah 17-15, 13-15, 13-15 in an chak zo ta lo a, silver medal-ah lungawi a zir a ngai ta a ni.

He tournament-ah hian Serchhip rawlthar Malsawmhlua pawh a partner Shaurya Mishra nen boy's doubles-ah an inlan a, semifinal-ah tlawmin bronze medal an la.