Milan derby-a Inter ngam loh Milan

Tun season Serie A-a hneh loh nei lo Inter Milan chuan ngam loh an tawng ta, an hneh loh hi tu dang ni loin an hmelma AC Milan niin, Rubemm Amorim-a naute lakah 3-1 in an tlawm.

Milan tan Christian Pulisic, Adrien Rabiot leh Diego Moreira te goal khat ṭheuh an khung a, Inter tan Alessandro Bastoni goal khungin awmzia a nei pha lo.

San Siro-a inkhelah goal a lut hma a, minute lina lekah Pulisic chuan Moreira cross chu goal kilah tak tauh lutin an hmahruaina goal a khung a, Milan an phur hle.

Minute ruk hnu lawkah Moreira corner pet chu Rabiot-a'n mawi zetin a chip lut a, Inter keeper Josep Martínez-a'n a en liam a, Milan-in an hmahruaina belhchhahin, Inter an inring hman lo.

Inter an insiamṭha hret a, minute 22-naah Hakan Calhanoglu corner pet chu Bastoni-a'n hnai tak aṭangin a tauh lut a, an si phurh sut ṭhenin Milan keeper Mike Maignan dem theih a ni lo.

Mahse, Inter an insiamrem hleithei lo a, Belgian full back Moreira an ngam lo. First half tawp hma hretin Morerira-a'n freekick aṭangin an hmahruaina a belhchhah a, Milan goal pathumah Moreira a inrawlh vek.

Second half-ah Inter-in an si phurh sut tumin theihtawp chhuah mah se Milan tlarhnung an ding khawng tlat a, Maignan chet ṭhat zan a nih bawk avangin Cristian Chivu naute tun season-a a vawi khatna atan an tlawm.