Bagan-in Punjab an hneh

Mohun Bagan-in tun season ISL-a an match hmasa berah NorthEast United ngam lo mah se, match thum a zawnin hnehna an chang ta - Kolkata club hian Inrinni zan khan an mikhual Punjab FC chu 2-1 in an hneh.

Punjab hian minute thumna lekah Alfred Planas hmangin goal hmahruai khung mah se, Bagan tan Lee Erwin leh Dejan Dražić ten an chhanglet a, 2-1 in an chak. Bagan tan Lallianzuala Chhangte chu bench aṭangin, hun tawp dawnah a lut a, Lalengmawia Ralte (Apuia) chu damlohna avangin a la inlan thei lo.

Inrinni zan inkhel pakhat zawkah Chennaiyin leh Kerala Blasters te 0-0 in an inhnehtawk a, hun pek belhah player pakhat ve ve hnawhchhuah an ni.

Chennaiyin tan PC Laldinpuia leh Ayush Chhetri ten bul an ṭan a, C. Lalhriatpuia chu bench aṭangin a lut bawk - Blasters tan Freddy Lallawmawma'n inkhel bul a ṭan ve bawk.

Zirtawpni zanah NorthEast United an vanduai - Bengaluru lakah minute 15-naa Jithin MS goal khung chu chakpui mai turah an inngai a, mahse, hun pek belh minute thumnaah Vinith Venkatesh chuan Bengaluru tan si phurh a sut a, 1-1 in an ṭin.

Bengaluru tan Lalremtluanga Fanai chuan inkhel bul ṭanin, NorthEast United tan Mark Zothanpuia chu bench aṭangin a lut bawk.