PSG tan Hakimi a vul

Paris St-Germain chuan Zirtawpni zan khan Le Havre lenchilhin 5-1 in an hneh a, Achraf Hakimi chuan a career-a a vawi khatna atan hattrick a siam a, PSG goal zawng zawngah a inrawlh vek.

Stade Océane-a inkhelah mual neitu team tan Josh Maja chuan minute 18-na lekah goal hmahruai a khung a, mahse hei hi PSG chhaih kawlhna mai chauh a ni a, ben harhin an awm nghal.

Minute riat hnu lawkah Mika Godts chuan an si phurh sutna goal a khung a, minute hnih hnu lawkah Hakimi-a'n a goal khatna leh an hmahruaina goal khung ve nghal bawkin, first half-ah goal dang a lut tawh lo.

Second half aṭangin PSG an chungnung tluan tawh a, minute 55-naah Hakimi-a'n a khung belhin bul a ṭan a, minute 62-naah Senny Mayulu chuan an goal lina khungin, minute sarih hnu lawkah Hakimi-a'n hattrick a siam a, an chak nemnghehna goal khungin PSG an chak chiang.

Tun season-ah Luis Enrique naute hian bul an ṭan ṭha tawk lo a, an dinhmun pawh a nghing hman hial. Mahse, insiamṭha leh tawhin, an match hnuhnung pangaah hnehna an chang vek a, Champions League leh Ligue 1 champion an nih chhan an lantir.