Atletico hmachhawn tur Bayern an buai

German champion Bayern Munich an buai hle - an coach Vincent Kompany lo kir hun tur sawi theih a ni lo a, he thu buatsaih a nih lai hian Serge Gnabry, Ismael Saibari leh Michael Olise te dinhmun a la chiang lo vek bawk - zanin dar 1:30-ah Champions League match khelin Atletico Madrid an lenchilh ang.

Bayern Munich head coach Vincent Kompany hi October 23 khan training ground-ah a tlu a, meningeal irritation a nei tih hmuhchhuah niin, tunah chuan damdawi in aṭangin a chhuak tawh.

Mahse, German club hian Kompany-a'n club a kaihhruai theih hun tur an la sawi lo a, tunah phei chuan football hrim hrim sawi pawh an la phal rih lo!

Kompany awm loh chhunga Bayern enkawl tura tih Aaron Danks chuan, "Kompany hi club khelh dan leh kalphungah rawn theih a ni rih lo a, club thuneitu lamin chutiang chungchanga be miah lo turin min hrilh.

"Vince hian a hriselna ngaihtuah chungin inenkawl phawt se, dam takin lo kir leh se an duh ber a ni," tiin a lo sawi tawh - Bayern hian Kompany kir hun tur hi, "Kar engemaw zah hnuah," tiin an sawi a, zaninah a la ho theih hmel loh.

Bayern hian Kompany tel loin match thum an khel tawh a, league match hnihah point li hmuin, German Cup-ah an chak a, an match hnuhnung berah Borussia Dortmund chu 2-2 in an draw.

He inkhelah hian Gnabry, Saibari leh Olise te an inhliam a, hliam vanga inlan thei lo, goalkeeper Manuel Neuer erawh chuan, "Ka inlan theih ka beisei," tiin zanina Atletico hmachhawn theih a inbeisei thu a sawi thung.

Bayern hian UCL match thum an khelh tawh aṭangin point nga chiah an la nei a, Barca hian point ruk an nei mek thung.