Zemabawkin Ahruaia la lut

Zemabawk Basketball Club chuan an assistant coach thar atan H. Lalhruaitluanga an la lut a, Ahruaia hi ZBBC head coach ni mek C. Vanengmawia nen an thawk dun dawn.

Ahruaia hi tualchhung basketball-ah mi thar a ni lo a, Mizoram Super League lo khel tawh Mission Veng Vikings, Chanmari Vikings, Khatla TBL leh Mission Veng Hotshots te pawh a lo enkawl tawh. Kumin Favang Tournament-ah khan Zarkawt BCA enkawlin, ZBBC hi a final-ah a hneh nghe nghe.

MSL season 8-ah khan Ahruaia hi TBL-ah assistant coach niin, khatih laia champion zawn rei tak BCA chu hnehin a champion pui. Hemi ṭum hian finals-ah game 3 nghah thlen ngai loin BCA an hneh thei.

Hei bakah hian division hniam zawk leh hmeichhe team bakah, school leh college thlengin a enkawl tawh a, a tawnhriat hi Zemabawkin hman ṭangkai an tum dawn.

ZBBC hian 2025 khan MSL-a an season hmasa berah semifinal thlengin, final thleng turin TBL an hneh zo lo. Kumin MSL-ah erawh champion lai BCA hnehin final an inhlangkai a, mahse TBL bawk hneh loin nomawi an la chawi thei lo. Favang Tournament khelh zawh takah khan TBL hneh mah se final-ah an vanduai.

November 17 aṭang hian MBBA Cup neih leh a ni dawn a, Ahruaia tan Zemabawk a zawm hnua inelna hmasa ber a ni ang - a lakah ZBBC fans-in beisei an nei sang dawn.