Final-ah Bawngkawn leh Chawnpui

Life Care Pharmacy ADFA First Division semifinal-ah Bawngkawn FC leh Chawnpui FC ten hnehna an chang a, final an lut. Nomawi inchuhna hi November 4, Nilaini chawhnu dar 1:00 hian Durtlang Football Stadium-ah neih a ni ang.

Semifinal hmasa zawkah Ricky Lallawmawma enkawl Bawngkawn FC-in Robena goal hmangin Ramhlun Norh 1-0 in an hneh. League winner Ramhlun North-in final an thleng zo lo.

Inkhel hnuhnung zawkah Chawnpui FC-in extra time-ah Tuithiang FC 2-1 in an hneh hram. First Division aṭangin team hnihin MPL Qualifier an khel thei a, League winner Ramhlun North khel turin an tling tawh a, Bawngkawn FC leh Chawnpui FC inkhela chak zawkin qualifier an lut ang.

ADFA chuan nimin khan best player dawng thei tur hming paruk a tar chhuak a, chung player-te chu Ricky Lallawmawma (Bawngkawn FC), Robena (Bawngkawn FC), Ephraim Vanlalduhsaka (Chawnpui FC), Fredy Lalrinchhana (Tuithiang FC), Dantes K. Lalhriatpuia (Tuithiang FC) leh Royal Moses (Ramhlun North FC) te an ni.